Deputeti i AAK-së, Muharrem Nitaj, i është kundërpërgjigjur ish kryeministrit Mustafa, në debatin “social” i cili filloi nga deputeti i AAK-së, ku fjala ishte për disa shkelje kushtetuese të njëri tjetrit.
Reagim për Nitajn pati edhe zyrtari i LDK-së, Bajram Gecja, por Nitaj i është përgjigjur edhe atij kësaj radhe.
Postimi i plotë:
Përgjigje për ish kryeministrin Mustafa
E para, e vlerësoj që ish kryeministri Mustafa, është përfshirë vet në vazhdimin e debatit të nisur prej tij, për shkelësit e Kushtetutës dhe nuk i ka lënë hyzmeqarët, sado që të paktën njëri prej tyre, që nuk ia vlen t’i përmendet as emri, edhe pse i “abortuar” nga LDK-ja, nuk e lë pa hyrë në valle, edhe pa e ftuar hiç!
Për Ish kryeministrin i kam disa pyetje: Nëse qenka turp që një deputet ta votojë një ligj i cili mund të rezultojë i papajtueshëm me Kushtetutën, pse nuk qenka turp që një Kryeministër të nënshkruaj një marrëveshje ndërkombëtare e cila nuk qenka në pajtim në 23 nene të saj me frymën e Kushtetutës!?
Për mua as njëra as tjetra nuk janë të turpshme, sepse të gjithëdijshëm nuk jemi, por turp është kur këtë nuk e pranon, ose përpiqesh ta minimizosh!
E dyta, meqë i paskeni gjetur të gjithë shkelësit e Kushtetutës; Qeverinë, Parlamentin, deputetët, pse nuk e keni përmendur edhe Presidentin, që është filtri i fundit i një ligji para se të hyjë në fuqi!?
Dhe e fundit, a hiç nuk shihni ngjashmëri me shkeljet që keni bërë vet, dhe me “gverrin” që na e keni lënë me marrëveshjen e Asociacionit, sado që ato janë në proces për t’u korrigjuar pas Kushtetuesës, apo gabimet e të tjerëve janë sa bjeshka e tuajat janë hiç fare.
Prandaj e kam përmendur atë metaforën e pulës së kojshisë që vezën e bën më të madhe, pa as më të voglin kasavet se do të turpërohesha, por e pranoj se nuk kam llogaritur se ju krejt këtë debat, do ta shndërronit në luftë pulash e vezësh, ose pse nuk do ta kuptonit metaforën ose pse kështu do ta kishit më të lehtë!
MN
Ps. Çështjen e zgjedhjes suaj Kryetar Parlamenti, as që e kam zënë në gojë. Nuk e kuptova pse e keni përmendur!
