Zyrtari i Lidhjes Demokratike të Kosovës, Bajram Gecaj, ka thënë se mocioni i mosbesimit dhe rrjedhimisht rrëzimi i qeverisë nuk është as për së afërmi, sipas tij, kjo është zgjidhja e mjaftueshme dhe fatlume për të ardhmen e qytetarëve të Republikës së Kosovës, përcjell “Bota sot”.
Gecaj këtë e ka bërë të ditur përmes një postimi në Facebook i cili ka shkruar se kjo klasë politike, ky sistem i kriminalizuar qeverisës, kjo “kapje” e shtetit dhe kjo ndërlidhje vëllazërore e mafies me qeverisjen duhet çmontuar në rrënjë.
Postimi i plotë:
ULËRIMAT E “BISHËS” SË PLAGOSUR!
Mocioni i mosbesimit dhe rrjedhimisht rrëzimi i qeverisë nuk është as për së afërmi zgjidhja e mjaftueshme dhe fatlume për të ardhmen e qytetarëve të Republikës së Kosovës. Kjo klasë politike, ky sistem i kriminalizuar qeverisës, kjo “kapje” e shtetit dhe kjo ndërlidhje vëllazërore e mafies me qeverisjen duhet çmontuar në rrënjë, në palcë dhe përfundimisht! Ulërimat të cilat po dëgjohen nga pjesëtarë të kësaj kaste, dëshirojmë të besojmë se pasqyrojnë klithjet e fundit dëshpëruese të “bishës” së plagosur para shkuarjes së tyre në “amshim” të përhershëm! Fati ynë dhe i fëmijëve tonë është në duart tona!
