Marko Gjuriq, shefi i të ashtuquajturës “Zyrë për Kosovën”, brenda qeverisë së Serbisë sot ka vizituar Kosovën.
Gjuriq ka vizituar sot Zveçanin për të inauguruar një kompleks hotelerie i cili sipas raportimeve është financuar nga Serbia.
Kjo po ndodh një javë pasi Ministria e Punëve të Jashtme e Kosovës mori vendim që të mos e lejojë hyrjen në Kosovë të asnjë zyrtari serb.
Ky vendim i MPJ-së, bëri shumë zhurmë. Fillimisht, ishte kryeministrja serbe, Ana Bërnabiq ajo që tha se ky vendim është “lajm i rremë”, dhe se nuk ishte marrë një vendim i tillë.
Njëlloj tha edhe kryeministri Haradinaj, duke lënë të kuptohet se nuk kishte koordinim të shefit të qeverisë me Ministrinë e Punëve të Jashtme.
Ndërsa, për vizitën e sotme të Gjuriqit, Ministria e Punëve të Jashtme i ka dhënë një përgjigje zyrtare.
“Gjuriq e ka marrë lejen për vizitë nga Qeveria e Kosovës dhe jo nga Ministria e Punëve të Jashtme”, thuhet në përgjigjen e MPJ-së.
Në anën tjetër media ka kontaktuar edhe me zyrën e kryeministrit të Kosovës, Ramush Haradinaj, të cilët kanë thënë se për punën e lejeve duhet të pyeten nga në Ministrinë e Punëve të Jashtme.
Ministria e Punëve të Jashtme dhe Qeveria e Kosovës i kanë drejtuar gishtin njëra-tjetrës për vizitën e Gjuriqit në Kosovë.
Vlen të theksohet se ndalim të hyrjes në Kosovë ka marrë edhe ministri serb i mbrojtjes, Aleksandër Vulin, pasi po konsiderohet se qëllimet e tij janë provokuese.
