Qysh nga viti 1953 qytetarëve e Evropës iu garantohen të drejtat përmes Konventës Evropiane për të Drejtat e Njeriut, ku për çdo shkelje ata mund t’i drejtohen Gjykatës Evropiane të Drejtësisë, me seli në Strasburg të Francës.
Fatkeqësisht këtë të drejtë nuk e gëzojnë qytetarët e Kosovës.
Këtë përgjigje, mori Gazeta “Bota sot”, kur kërkoi nga Gjykata e Strasburgut, të tregoj nëse ndonjëherë është kërkuar kompenzim për dëmet e shkaktuara nga Serbia, në luftën e fundit, respektivisht periudhën 1999-1998.
Komisioni Evropian nëpërmjet një emaili, ka njoftuar gazetën “Bota sot”, se Kosova nuk është pjesë e Konventës Evropiane mbi të drejtat e njeriut.
“Kosova asnjëherë nuk ka iniciuar një rast ndër-shtetëror kundër Serbisë para Gjykatës Evropiane për të drejtat e njeriut. Në fakt një gjë e tillë është e pamundur shkaku që Kosova nuk është shtet anëtar i Konventës Evropiane mbi Të Drejtat e Njeriut”, njofton Komisioni Evropian nëpërmjet emailit.
Ndryshe, Presidenti i vendit Hashim Thaçi ka ripërsëritur herë pas here deklaratat se Kosova do ta padis Serbinë për gjenocid, por një gjë e tillë nuk ka ndodhur.