Kurti pret delegacionin britanik, diskutohet edhe për Procesin e Berlinit - Bota Sot
Kurti pret delegacionin britanik, diskutohet edhe për Procesin e Berlinit

Aktuale

Kurti pret delegacionin britanik, diskutohet edhe për Procesin e Berlinit

Më: 17 korrik 2019 Në ora: 12:14
Albin Kurti pret delegacionin britanik

Delegacioni nga Mbretëria e Bashkuar i kryesuar nga Drejtori për Ballkanin Perëndimor në Zyrën e Jashtme, Andrew Page sot vizitoi Lëvizjen Vetëvendosje ku u pritën nga kreu i këtij subjekti, Albin Kurti dhe figura të tjera të Lëvizjes.

Kurti e njoftoi delegacionin për zhvillimet e fundit në Kosovë me fokus të veçantë situatën socio-ekonomike, mungesën e zhvillimit ekonomik, nivelin e lartë të papunësisë sidomos tek gratë dhe të rinjtë, nevojën për reformim të sistemit të drejtësisë dhe nevojën shumë të madhe të lidhjes së sistemit edukativ me ekonominë.

Në anën tjetër, Page tregoi interesimin e Mbretërisë së Bashkuar për t'i ndihmuar Kosovës në fushën e zhvillimit ekonomik përmes përkrahjes së ndërmarrësisë tek të rinjtë me interes të veçantë në fushën e shkencave kompjuterike dhe dixhitalizimit si dhe për të krijuar mundësi për të rinjtë që ata të mos largohen nga vendi.

Po ashtu, Page njoftoi për dyfishimin e fondeve që ndanë Mbretëria e Bashkuar për rajonin e Ballkanit Perëndimor dhe dyfishimin e ekspertëve për të ndihmuar në luftimin e korrupsionit dhe krimit të organizuar e krimit kibernetik.

Ndër çështjet tjera për të cilat u diskutua ishte Procesi i Berlinit, të arriturat dhe fushat ku duhet fokusuar në të ardhmen ku Kurti sugjeroi se Procesi i Berlinit duhet të iniciojë një fond për zhvillim ekonomik të ngjashëm për Ballkanin siç ishte Plani i Marshallit për Evropën me fokus të veçantë në qytetet e ndara.

Sa i përket dialogut më Serbinë, Page përsëriti qëndrimin e Mbretërisë së Bashkuar e cila është kundër iniciativës për ndryshimin e kufijve.

Ndërsa, Kurti ritheksoi qëndrimin e Lëvizjes Vetëvendosje, për një dialog të hapur nga poshtë-lartë për zhvillim si mënyrë për integrim e përparim.

Shfaq komentet
comments powered by Disqus
Sot mund të lexoni Shfletoni kopertinat
Sondazh Pas votimit të projektligjeve për shndërrimin e FSK-së në ushtri, a mund të ketë inskenime nga Serbia për një luftë të re në Ballkan?
Loading...