Sekretari i Përgjithshëm në AKR, Vesel Makolli në një postim të tij në Facebook ka shkruar se dorëheqja e Haradinajt është një lajm i papritur dhe një ngjarje që e rëndon situatën tashmë të rënduar politike në vend.
Ai shkruan më tutje se dorëheqja e Kryeministrit Haradinaj është një veprim patriotik, njerëzor dhe i dinjitetshëm, sepse me këtë veprim Kryeministri ka treguar se Kosova dhe liderët e saj.
Postimi i plotë:
Kosova dhe populli i saj nuk i ka merituar të gjitha këto situata të pa lakmueshme që po i ndodhin 20 vjet pas çlirimit.
Dorëheqja e Kryeministrit Ramush Haradinaj, ka qenë një lajm i papritur dhe befasues për të gjithë opinionin në vend dhe më gjerë. Ishte e papritur pasi që Kryeministri Haradinaj dy here ka qenë në Hagë dhe të dy herët është shpallur i pafajshëm.
Kjo është një ngjarje e cila në masë të madhe e rëndon situatën edhe ashtu të rënduar politike në vend dhe në raport me marrëdhëniet ndërkombëtare. Është shumë me rëndësi në këto qaste jo të këndshme që faktori politiko-kosovar të veprojë konformë kushtetutës dhe të gjejnë gjuhë të përbashkët për veprimet e më tejme.
Dorëheqja e Kryeministrit Haradinaj është një veprim patriotik, njerëzor dhe i dinjitetshëm, sepse me këtë veprim Kryeministri ka treguar se Kosova dhe liderët e saj ,e respektojnë çdo kërkesë që del nga Gjykata Speciale duke u përballur dhe duke dëshmuar pafajësinë e tyre dhe luftën e pastër dhe çlirimtare të UÇK-së.
Nuk mendoj dhe nuk do të dëshiroja që të fshihej diçka pas kësaj dorëheqje pasi që për çdo qytetar të Kosovës, e sidomos për çdo lider të vendit, Kosova duhet të jetë mbi të gjitha. Vetëm me unitet dhe duke lënë anash interesat personale dhe partiake, mund ti kontribuojmë vendit për përballimin e sfidave që na presin ,si atyre në rrafshin vendor, ashtu edhe në rrafshin ndërkombëtar e sidomos për bisedimet me Serbinë për arritjen e një marrëveshje historike për të cilën është interesuar shumë faktori relevant ndërkombëtar. Edhe pse jemi vend i vogël e me një mal probleme të brendshme dhe të jashtme ,duhet të shpresojmë shumë se perspektiva për një Kosovë të zhvilluar demokratike dhe të gatshme që ti bashkohet BE-së është synim i cili do të realizohet falë edhe përkrahjes së miqve tanë ndërkombëtare e sidomos SHBA-së ,nunit të pavarësisë sonë.
