Pak orë pas publikimit të një fotografie ku Presidenti Hashim Thaçi, shihet duke mbajtur lartë gishtin e madh, i cili është simbol i PDK-së, veprim ky i cili u komentua si rikthim i tij në partinë që e ka krijuar vet, ka reaguar edhe kryetari i po kësaj partie Kadri Veseli.
I mbështetur edhe nga numri dy i PDK-së Memli Krasniqi, Veseli synon të marrë në dorë drejtimin e shtetit, pak ditë pas dorëheqjes së Ramush Haradinajt nga posti i Kryeministrit.
Kjo gjë u bë e ditur përmes një postimi të Krasniqit në rrjetin shoqëror në “Facebook”, ku shprehen gatishmëri për të marrë pjesë në zgjedhje.
Të njëjtin mesazh e ka ndarë edhe një llogari tjetër në “Facebook” e titulluar “Simpatizantët e PDK-së” e cila është në menaxhimin e po kësaj partie.
Ndryshe, derisa Veseli ka zgjedhur të shpreh ambicjet për kryetar shteti, anëtarët e shoqërisë civile publikimin e fotografisë me sinjalin e PDK-së e kanë konsideruar si sinjal për rikthimin e Thaçi në parti.