Deputeti i Lidhjes Demokratike të Kosovës që vjen nga qyteti i Prizrenit, Haxhi Avdyli, në një shpërndarje që e ka bërë në llogarinë e tij në rrjetin social Facebook, ka lënë të kuptohet se ai e mbështet deputeten Vjosa Osmani si kandidate për kryeministre nga partia e Ibrahim Rugovës.
Një llogari në Facebook, e titulluar “Me Vjosa Osmanin Kryeministre” ka postuar një fotografi në të cilën shihet deputetja Vjosa Osmani, deputeti Haxhi Avdyli, kryetarja e forumit të grave të LDK’së në Prizren, Sadije Osaj-Jakupi dhe anëtarë të tjerë të LDK’së. Në këtë fotografi është e shkruar “Në çdo lagje, në çdo rrugë, në çdo shtëpi, me çdo njeri, koalicioni ynë i vetëm”.
E pikërisht këtë fotografi, deputeti Avdyli e ka shpërndarë në llogarinë e tij, e që lë të kuptohet se ai publikisht tashmë e mbështet Vjosa Osmanin si kandidate për kryeministre të vendit nga radhët e LDK’së.
Të shtunën në orën 10:00 do të mbahet kuvendi zgjedhor i LDK’së në të cilin do të zgjedhet kryetari i ri. Është mësuar se Isa Mustafa do të jetë kandidati konsensual që ta vazhdojë mandatin përsëri në krye të partisë.
