Deputeti i Lëvizjes Vetëvendosje, Rexhep Selimi, për herë të parë foli për shkarkimin e kolonel Tahir Zemajt, nga pozita e komandantit, në takimin e “mistershëm” të mbajtur në shkollën e Prapaqanit.
Selimi konfirmoi se në atë takim ishte edhe fotoja e Ibrahim Rugovës, për këtë foto për të cilën thuhet se Hashim Thaçi kishte kërkuar të largohej, por Selimi nuk e konfirmon këtë por vetëm se pranon që fotoja e Rugovës ishte aty.
“E kam nuhatur se diçka nuk është në rregull. Zemaj filloi prezantimin e vet dhe pastaj të stafit të tij. Haradinajn e prezantoi si zëvendëskomandant”, shpjegon Selimi.
“Unë ndoshta kam gabuar pasi që i jam drejtuar Ramushit si komandant. Por i kemi thënë se në atë pozitë ishte caktuar dhe nuk mund të ia delegonte askujt”, ka deklaruar Selimi.
Mirëpo, në librin “Kështu foli Tahir Zemaj”, shkruhet se koloneli kishte treguar për takimin me personat që iu prezantuan si “Shtab i Përgjithshëm” i Ushtrisë Çlirimtare, e që në përbërje ishin Hashim Thaçi, Rexhep Selimi, Bislim Zyrapi etj.
Zemaj tregon se nga fundi i gushtit ata personin kishin shprehur dëshirë ta takonin dhe i pranoi në zyrën e tij, që ishte ish zyra e drejtorit të shkollës së Prapaqanit, ku aty ishin të varura në mur fotografitë e Skenderbeut, Presidentit Rugova dhe fotografia e Jusuf Gërvallës.
“Nga fundi i gushtit, jam informuar nga vendroja, se po afroheshin disa persona që kishin shfaqur dëshirë të më takonin. I pranova dhe m’u prezentuan si “Shtab i përgjithshëm” i Ushtrisë Çlirimtare. Kisha dëgjuar pak për ta por nuk dija se kush ishin të organizuar etj. Në përbërje të tij ka qenë Hashim Thaçi, Rexhep Selimi, Bislim Zyrapi etj”, tregon ai.
Koloneli tregon se sapo kishin hyrë në zyrë, ata i kishin dhënë dy minuta që ta heqin portretin e Rugovës, ndërsa që ai kishte refuzuar dhe kështu ata ishin tërhequr.
“Në zyrën time, ish zyra e drejtorit të shkollës së Prapaqanit, në mur kanë qenë të varura fotografitë e Skenderbeut, Presidentit Rugova dhe fotografia e Jusuf Gërvallës. Sapo kanë hyrë më kanë kërkuar që të hiqja fotografinë e Rugovës. “Ke dy minuta kohë për të hequr portretin e Rugovës!” më thanë, “Jo u thash, ai ka qenë dhe mbetet për mua Komandant Suprem i Forcave të Armatosura të Kosovës dhe President i saj !”. Nejse ata u tërhoqën nga ai qëndrim dhe ne i vazhduam bisedimet diku tjetër, në sallën operative të shtabit. Fillimisht kanë kërkuar se përse në të gjithë dokumentacionin tonë figuronte Republika e Kosovës?” vazhdon rrëfimi i Zemajt në librin “Kështu foli Tahir Zemaj”.
Ndërsa, për këtë takim, Fadil Hadergjonaj i njohur si komandant Bjeshka, në një intervistë të realizuar muaj më parë, ka rrëfyer se në atë takim fillimisht ishin shpërndarë vendime në formë të letrës, ku thuhej se Ramush Haradinaj emërohet komandant i zonës operative të Dukagjinit, dhe se Tahir Zemaj si zëvendëskomandant.
Ndërsa, kishte theksuar se të gjithë përfaqesuesit e shtabit të Përgjithshëm në atë takim, ishin prezantuar vetëm me nofkat e tyre të luftës, dhe në asnjë moment me emra.
“Tahir Zemaj në atë takim ka thënë se është i gatshëm t’i zbatojë këta urdhra, vetëm le të shënon në letër se kush është komandanti, që ta dijë se kush është përgjegjësi i atij vendimi. Ndërsa përgjigja e atyre ishte se ai emër nuk do të figurojë-kinse për arsye sigurie”, ka deklaruar Hadergjonaj.
