Lidhja Demokratike e Kosovës dhe Lëvizja Vetëvendosje janë duke bërë diskutimet e tyre për të arritur një koalicion parazgjedhor.
Mirëpo, pengesë kryesore sipas zyrtarëve të dy këtyre partive është duke paraqitur pozita e kryeministrit.
Nënkryetari i LDK-së, Lutfi Haziri tha në rtv Dukagjini se Vjosa Osmani është kandidatja e vetme nga LDK dhe se nuk e negociojnë postin e kryeministrit me VV-në.
Ngjashëm tha edhe Glauk Konjufca nga VV i cili shtoi se i pari i kësaj partie, Albin Kurti duhet të jetë në krye të qeverisë.
Mirëpo, analisti politik, Arton Demhasaj ka propozuar një formulë tjetër për zgjidhjen e këtij “ngërçi” mes dy partive.
Tha se i pari i LVV-së, Albin Kurti ka një profil më të mirë për postin e presidentit sesa për atë të kryeministrit.Siç u shpreh ai, LDK e VV duhet të propozojnë një emër të tretë për postin e kryeministrit.
“Profili i Kurtit është më shumë i mirë për president. Të gjendet një emër i tretë për kryeministër”, tha Demhasaj.
Por, Konjufca ripërsëriti mendimin e tij që Albin Kurti duhet të jetë kryeministër i vendit, kurse Vjosa Osmani kryetare e Kuvendit.
