Kandidatja e Lidhjes Demokratike të Kosovës për kryeministre Vjosa Osmani, sot ka vizituar Shtëpinë e Pavarësisë - Dr. Ibrahim Rugova.
Ajo ka thënë se në këtë shtëpi, është ndërtuar projekti më i madh për Kosovën shtet dhe fijet e miqësisë së madhe me SHBA-të dhe vendet e tjera, përcjell Bota sot.
Osmani ka theksuar se duhet demokraci dhe vendosmëri për ta ndërtuar shtetin mbi themelet e vlerave qytetëruese perëndimore.
Postimi i Osmanit në Facebook:
Shtëpia e Pavarësisë - Dr. Ibrahim Rugova, është vendi prej nga filloi projekti i pavarësisë dhe u vunë themelet e shtetit sovran të Kosovës.
Në këtë shtëpi të vogël, u ndërtua projekti më i madh për Kosovën shtet. Nga kjo shtëpi u lidhën fijet e miqësisë së madhe me SHBA-të dhe vendet e tjera. Bota e njohu përpjekjen tonë për liri.
Tri postulatet e dr. Rugovës: "Liri, pavarësi e demokraci" duhen jetësuar në shtet të qëndrueshëm e demokratik.
Prandaj, na duhet demokraci efektive dhe vendosmëri për ta ndërtuar shtetin mbi themelet e vlerave qytetëruese perëndimore.