Vetëvendosje me deputetët më të pasur: Lë shumë prapa PDK-në dhe LDK-në - Bota Sot
Vetëvendosje me deputetët më të pasur: Lë shumë prapa PDK-në dhe LDK-në

Aktuale

Vetëvendosje me deputetët më të pasur: Lë shumë prapa PDK-në dhe LDK-në

Më: 9 shtator 2019 Në ora: 18:34
Foto Ilustrim

Kosova po pret me ankth zgjedhjet e parakohshme të 6 tetorit. Nuk është një ankth që ka të bëj me fatin e vendit, aq sa ka të bëj me argëtimin që fiton kur sheh emra e trupa, disa të pëlqyer e disa të papëlqyer.

Duke qenë se të gjitha partitë politike në mënyrë brutale po shpërfillin qytetarët e shtresës së varfër të vendit, duke mos prioritetizuar politikat sociale, Periskopi mendoi të shihte pasurinë e të paktën 10 kandidatëve të parë të tri partive politike, PDK, LVV dhe LDK. Marksi thotë: “Më trego pozitën ekonomike, të tregoj se çfarë idesh ke”.

Te Lëvizja Vetëvendosje dhe Partia Demokratike e Kosovës u desh të zëvendësonim disa deputetë të dhjetëshes së parë me deputetët që pasonin, duke qenë se për ta nuk kishte të dhëna në Agjencinë Kundër Korrupsionit. Te partia e udhëhequr nga Kurti u desh të zëvendësonim Yllza Hotin, Haki Abazin dhe Arbërie Nagavcin me Xhelal Sveçlën, Fitore Pacollin dhe Ismajl Kurteshin. Te PDK-ja zëvendësuam dy gratë e sapoaderuara, Eliza Hoxhën dhe Besa Ismailin me Safete Hadërgjonajn.

Në këtë artikull nuk janë të përfshira detyrimet financiare që ndodhen në deklarimin e AKK-së.

Sa i përket pasurisë së paluajtshme prin Lëvizja Vetëvendosje, që ka deklaruar 5 milionë e 71 mijë Euro. Në vendin e dytë është Partia Demokratike e Kosovës që ka deklaruar 4 milionë e 236 mijë Euro. E fundit është Lidhja Demokratike e Kosovës me pasuri të paluajtshme prej 4 milionë e 110 mijë euro.

Më i pasuri te LVV është Xhelal Sveçla, të cilit i duhen vetëm edhe 50 mijë për ta rrumbullakuar shifrën e 2 milionëve. I pasur është edhe Arben Vitia, që ka 1 milionë e 45 mijë euro. Te PDK-ja më e pasura është Blerta Deliu Kodra me 1 milion e 340 mijë euro. Ndërkaq te LDK-ja, më e pasura është prijësja Vjosa Osmani, që ka 950 mijë euro pasuri të paluajtshme.

Sa i përket veturave, këtu prin PDK-ja me 154 mijë euro së bashku. Pas saj është LDK-ja me 96 mijë ndërsa e fundit është VV me 91 mijë.

Edhe te paratë e gatshme prin PDK-ja me 381 mijë Euro. E dyta është dhjetëshja e LDK-së me 257 mijë ndërsa e fundit është LVV me 76 mijë.

*Deputetët e PDK-së: Kadri Veseli, Hajredin Kuçi, Enver Hoxhaj, Valon Murati ,Memli Krasniqi, Bedri Hamza, Blerta Deliu Kodra, Uran Ismaili, Xhavit Haliti, Safet Hadërgjonaj;

*Deputetët e VV-së: Albin Kurti, Glauk Konjufca, Albulena Haxhiu, Arben Vitia, Liburn Aliu, Fatmire Mulhaxha-Kollçaku, Xhelal Sveçla, Rexhep Selimi, Fitore Pacolli, Ismajl Kurteshi;

*Deputetët e LDK-së: Vjosa Osmani Sadriu, Kujtim Shala, Avdullah Hoti, Lumir Abdixhiku, Anton Quni, Lirije Kajtazi, Besian Mustafa, Driton Selmanaj, Hykmete Bajrami, Dortuntinë Maloku.

Shfaq komentet
comments powered by Disqus
Sot mund të lexoni Shfletoni kopertinat
Sondazh Pas votimit të projektligjeve për shndërrimin e FSK-së në ushtri, a mund të ketë inskenime nga Serbia për një luftë të re në Ballkan?
Loading...