Kandidatja për kryeministre të vendit nga radhët e LDK-së, Vjosa Osmani, përmes një shkrimi në llogarinë e saj në rrjetin social Facebook, ka treguar se e ka vizituar Komunën e Klinës.
Ajo thotë se Klina, në momentet më vendimtare, në vitet e mobilizimit të madh të viteve '90, ka ditur të rreshtohet pas presidentit historik, dr. Rugovës.
Ja shkrimi i saj:
Sot në Klinë: Besimin qytetar, LDK-ja do ta kthejë në shpresë për jetësimin e shtetit
Kam ardhur në Klinë e lumtur ta shohë bashkëveprimin mes demokracisë qytetare, të përfaqësuar nga LDK-ja dhe kristiandemokracisë, të përfaqësuar nga PSHDK-ja. Demokristianët janë rikthyer natyrshëm në LDK - adresën e vetme të besimit të qytetarëve të Kosovës. Këtë besim qytetar LDK synon ta kthejë në besim për jetësim të shtetit tonë.
Klina, në momentet më vendimtare, në vitet e mobilizimit të madh të viteve '90, ka ditur të rreshtohet pas presidentit historik, dr. Rugovës. Sot, si në vitet '90, na duhet rimobilizim nacional për ta rimëkëmbur shtetin e Kosovës. Pas 20 vjetësh zvarritjeje e keqpërdorimesh, ka ardhur koha që me guxim intelektual e besim në bashkëveprimin me qytetarët, republikën t'ua kthejmë qytetarëve, atyre që nuk rreshtën së besuari në projektin tonë.
