(E plotësuar) - Lidhja Demokratike e Kosovës (LDK), sonte në mesnatë ka hapur zyrtarisht fushatën zgjedhore për zgjedhjet e 6 tetorit.
Vjosa Osmani, kandidate e LDK-së për kryeministre, duke shprehur bindjen për fitoren e LDK-së, tha se kjo parti është parti e qytetarëve, ndërsa, të tjerat parti janë të pronarëve. Osmani në hapje të fushatës tha se fitorja e LDK do të jetë historike.
Osmani: Fitorja e LDK është fitore e Kosovës
“Tash fillojmë me fitoren historike të LDK-së dhe të Kosovës. Natyrisht që fitorja e LDK-së është edhe fitorja e Kosovës. LDK është e vetmja parti e qytetarëve, sepse të tjerët janë parti me pronarë. Tash e tutje qytetarët do t’i shohin veprat tona dhe punë të tona të ndershme, për të cilat do të krenohet secili prej tyre”, tha Osmani.
Ndërsa, shefi i shtabit zgjedhor në LDK, Lutfi Haziri duke ftuar simpatizantët e LDK në tubimin elektoral për të prezantuar kandidatët për deputet, tha LDK do të jetë fituese në këtë zgjedhje, ndërsa, pati një porosi për partitë tjera.
Haziri: Partive tjera ju themi “fleni - fleni”
“Sot në orën 19:00 në mbrëmje, Prishtina, zbritni në shesh në papuqe... Manifestiki më i madh që ka me ndodhë sot në Prishtinë, është falë juve, ne ju mirëpresim, e atyre të tjerëve ju themi: fleni – fleni”, tha Haziri.
Fushata zgjedhore zgjatë dhjetëditëshe, zgjatë deri më 4 tetor, derisa zgjedhjet parlamentare mbahen më 6 tetor.
***
Lidhja Demokratike e Kosovës në një atmosferë festive ka hapur sonte zyrtarisht fushatën zgjedhore, proces ky që do të mbahen më 6 tetor.
Kandidatja e këtij subjekti për Kryeministër të Kosovës, Vjosa Osmani, ka mirëpritur pjesëmarrjen e simpatizantëve të saj, duke thënë se fitorja e LDK-së do të jetë fitore e Kosovës, njofton Klan Kosova.
”Prej sonte ka fillu numërimi mbrapsht për fitoren historike të LDK-së edhe të Kosovës. E natyrisht që fitorja e LDK-së është fitore e Kosovës sepse është e vetmja parti e qytetarëve, të tjerët thjeshtë janë parti me pronarë”.
”Tek ne s’ka pronarë, tek ne ka punë për qytetarët e Kosovës e meqë kemi fol mjaft për sonte, tash e tutje qytetarët do t’i shohim punët tona të ndershme me të cilat do të krenohet secili prej tyre”.
LDK-ja hap fushatën zgjedhore me bindjen për fitore në zgjedhjet e 6 tetorit
Lidhja Demokratike e Kosovës ka hapur zyrtarisht fushatën parazgjedhore në orën 00:00.
Vjosa Osmani, kandidatja e kësaj partie për kryeministre, ka mbajtur një fjalim para të pranishmëve para selisë së LDK-së.
Po ashtu, fjalim ka mbajtur edhe Nënkryetari i partisë, Lutfi Haziri.
Të dy janë shprehur të bindur se partia e tyre do t’i fitojë zgjedhjet e 6 tetorit.
Ndërkaq, partitë dhe koalicionet tjera pjesëmarrëse në zgjedhjet e 6 tetorit kanë paralajmëruar nisjen e fushatës parazgjedhore gjatë ditës së mërkurë.
