Kandidati i PDK-së për deputet Memli Krasniqi, ka folur në lidhje me ish zyrtarin amerikan Mathew Whitaker, i cili sot mori pjesë në fushatën e PDK-së.
I ftuar në Interaktiv të KTV-së, Krasniqi pretendoi se PDK nuk po e prezanton atë artificialisht si njeri të Trumpit.
“Jo, nuk është njeriu i Trampit në thonjëza, sepse deri para pak muajsh ai ka shërbyer në departamentin e drejtësisë amerikane… Kurrë asnjëherë në historinë e Kosovës nuk ka qenë në ndonjë fushatë të ndonjë partie politike një njeri i këtij niveli. Ai është një njeri i respektuar në të gjitha çarqet e SHBA-ve. Është një njeri që sot e kësaj mbetet një nga fytyrat më të famshme për luftimin e korrupsionit”, ka thënë Krasniqi
Ai ka komentuar edhe demantin e Ambasadës Amerikane në Prishtinë për mbështetje të subjekteve politike të caktuara.
“Është e drejt e ambasadës me thanë një gjë të tillë, ne nuk themi që Amerika na përkrahë neve, absolutisht jo, ne mund të themi që jemi ne ata që e duam Amerikën më shumë në këtë garë, ka thënë Krasniqi
Kur është pyetur për hetimet e FBI-së ndaj Whitaker, në lidhje me një skemë mashtruese në Florida, Krasniqi ka dhënë këtë përgjigje:
“Ju çfarë doni mund të flisni, unë po flas për një njeri që Donald Trump e ka emëruar në krye të departamentit të drejtësisë”, ka thënë Krasniqi për njeriun që Veseli ka angazhuar për ta përkrahur atë në luftën kundër korrupsionit.