Sot bëhen 22 vjet, nga rënia heroike e dëshmorit Adrian Krasniqi, gjatë një sulmi të Ushtrisë Çlirimtare të Kosovës në Stacionin e policisë serbe, në Kliçinë, në afërsi të Pejës.
Në këtë përvjetor të rënies së tij, kryeministri në detyrë Ramush Haradinaj i ka kushtuar disa fjalë jetës dhe veprës së tij.
Ai ka thënë se ndjehet krenar për kohën se kur është njohur me dëshmorin Adrian Krasniqi.
“Ishe student i dalluar po aq sa dhe luftëtar. Gjithmonë besove në liri, për të cilën dhe u përjetësove 22 vite më parë, duke i prirë karvanit të dëshmorëve të Pejës.
Ishe i dashur, i guximshëm me të gjitha tiparet e heroit. Ashtu do të mbetesh në kujtimin tonë dhe të brezave që vijnë Adrian Krasniqi, Hero dhe Gjeneral.
Duke u përulur para veprës tende madhore, krenohem që u njohëm bashkë në ditët e lavdisë. Kombi që ka njerëz si ti, ka të ardhme të ndritur.
Lavdi e përjetshme!
RH”, ka shkruar ai në Facebook.
Kujtojmë se Adrian Krasniqi ka rënë heroikisht më 16 tetor të vitit 1997.