( E plotësuar) - Lëvizja Vetëvendosje është deklaruar për një aksident që ka ndodhur në aksin rrugor Tiranë – Durrës, e ku u raportua se është përfshirë vetura e liderit të kësaj partie, Albin Kurti.
Nga Zyra për Media e VV’së i kanë konfirmuar se aksidenti ka ndodhur, por nuk ka të lënduar.
“Gjithçka është në rregull, ka qenë një aksident pa lëndime njerëzore”, thonë nga VV.
Kurti qëndroi në Tiranë mbrëmjen e sotme për ta festuar fitoren e VV’së në zgjedhjet parlamentare në Kosovë.
***
Pak minuta më parë, nga mediat nga Tirana u raportua një aksident në autostradën Tiranë-Durrës, pranë kthesës së aeroportit.
Nga pamjet e dërguara, shihej një automjet tip “Volvo” që kishte goditur në anën e pasme një automjet policie.
Burime ekskluzive të medias bëjnë me dije se automjeti që është përfshirë në aksident është makina e liderit të Vetëvendosjes, kryeministrit të zgjedhur të Kosovës, Albin Kurtit.
Të njëjtat burime konfirmojnë se Kurti është transportuar me makinën e patrullës së policisë deri në Tiranë.
Nuk dihen ende se cili ka qenë shkaku i përplasjes që fatmirësisht ka kaluar pa të lënduar.