Tifo-grupi “Dardanët” sot kanë mbajtur konferencë për media para dy ndeshjeve tejet të rëndësishme të Kosovës, asaj ndaj Republikës së Çekisë dhe Anglisë.
“Dardanët” janë shprehur të gatshëm për ndeshjen ndaj Anglisë të cilën Kosova e zhvillon në stadiumin “Fadil Vokrri” në Prishtinë, dhe kanë premtuar një pritje madhështore për lojtarët si dhe tifozët të cilët do të vijnë në Prishtinë.
Kryetari i “Dardanëve”, Lulzim Berisha në këtë konferencë tha se janë bërë të gjitha përgatitjet për këtë ndeshje dhe se slogani zyrtar duhet të dalë nga ky tifo-grup.
Berisha: Slogani zyrtar duhet të dalë nga “Dardanët”
“Mendoj që prej këtu duhet me dalë slogani për pritjen e anglezëve. Sepse ne e kemi marrë një iniciativë që përpos aspektit sportiv që është një ndeshje jetike për Kosovën, ndeshja në Plzen, mendoj që shtetërore dhe popullore është pritja e shtetit anglez dhe lojtarëve anglezë këtu. Ne e kemi organizuar edhe bashkarësisht kemi vendosur që me nxjerrë një slogan zyrtar prej ‘Dardanëve’, jo prej grupeve të tjera edhe pse nuk na pengojnë ato mirëpo duhet me qenë direkt prej neve që jemi marrë me ketë çështje prej fillimit”, tha Berisha.
I pyetur nëse ndonjë rezultat negativ ndaj Çekisë do ta zbehte rëndësinë e ndeshjes ndaj Anglisë, Berisha u shpreh se një gjë e tillë nuk do të ndodhë, pasi që Anglia është kombëtarja më e madhe botërore që po luan në Prishtinë.
Berisha: Çdo rezultat ndaj Çekisë, nuk e zbehë rëndësinë e ndeshjes ndaj Anglisë
“Mendoj që edhe humbja në Çeki nuk duhet dhe as nuk e kemi në plan me zbeh sepse është jetike për shtetin në përgjithësi. Mendoj që pak a shumë është më e vlefshme për shtetin se sa një kualifikim, mundemi me fitu edhe në Çeki mirëpo mos mi prit anglezët.... Këtu janë diku rreth 12 mijë shqiptarë që kemi me tregu kulturën tonë ndaj të gjithëve, cilido shtet që ka ardhur këtu. Iu kemi shënuar nga 2-3 gola që besa edhe 4 i kemi përcjellë me duartrokitje të gjithë. E vetmja mënyrë se si të poshtërosh një ekip është ta mposhtësh nga 2:0, 3:0, për pjesën tjetër ja lëmë kulturës shqiptare”, shtoi Berisha.
Kordinatori i eventeve kulturore në Komunën e Prishtinës, Ardian Berisha në këtë konferencë bëri të ditur se Komuna e Prishtinës do të transmetojë dy ndeshjet e Kosovës në amfiteatrin e qytetit, si dhe aktivitete të tjera për mikpritjen e tifozëve anglezë.
Berisha: Ndeshja Çeki-Kosovë do të transmetohet në amfiteatrin e qytetit
“Komuna e Prishtinës në këtë rast bashkëpunon me tifo-grupin ‘Dardanët’, me Federatën e Futbollit të Kosovës, fillimisht për transferimin e ndeshjes Çeki-Kosovë e cila do të ndodhë në amfiteatrin e qytetit dhe e cila e ka një vlerë të njëjtë me mikpritjen e tifozëve dhe lojtarëve anglezë në qytetin tonë respektivisht në gjithë territorin e Republikës së Kosovës. Pra duhet të dimë që dy këto gjëra janë të rëndësishme dhe baraspeshojnë njëjtë, si ndeshja jetike në Plzen të Çekisë kundër Çekisë, ku shpresojmë që kombëtarja jonë të fitojë gjithashtu edhe mikpritja e tifozëve dhe lojtarëve anglezë siç e ceka më herët”, u shpreh Berisha.
Numri i tifozëve anglezë që do të vijnë në Kosovë pritet të jetë i lartë, pasi raportohet se 95% e dhomave të hoteleve në Prishtinë janë të rezervuara për këto ditë.
Fatmir Spahiu, anëtari i tifo-grupit “Dardanët” u shpreh se përpos mikpritjes ndaj lojtarëve anglezë, duhet t’i përkrahim sa më shumë futbollistët e Kosovës. Ai i cilësoi djelmoshat e Kosovës si djemtë më të mirë që ka ky vend
Spahiu: Përpos mikpritjes, duhet t’i përkrahim sa më shumë djemtë e Kosovës
“Ne e dimë një marrëdhënie speciale dhe jashtëzakonisht falënderuese të cilën e ka shteti ynë, themi një shtet borxhli ndaj Anglisë për krejt ato që Anglia ka bërë për Kosovën në vitet e rënda për ne. Kjo është njëra prej arsyeve kryesore që ne kemi shfaq një dëshirë vullnetare dhe kemi pranuar me kënaqësi festën e kryetarit të ‘Dardanëve’ që të japim një kontribut vullnetar për të organizuar një mikpritje sa më madhështore për miqtë tanë të çmuar dhe të shenjtë. Natyrisht përveç idesë së mikpritjes ne jemi jashtëzakonisht mirë që t’i përkrahim djemtë më të mirë që ka Kosova e të cilët janë lojtarët e Kombëtares së Kosovës, janë ikona e këtij shteti, dhe faqja e bardhë e këtij vendi. Ne jemi të gatshëm që në çdo moment të japim një kontribut modest në mënyrë që Kombëtarja e Kosovës çdo ditë e më shumë të rritet jo vetëm në rezultate, sepse rezultatet nuk janë puna jonë por që të ketë edhe një përfaqësim të dinjitetshëm edhe të na prezantojë sa më mirë që është e mundur”, u shpreh Spahiu.
Ndërkaq anëtarja e tifo-grupit të femrave “Dardanet”, Vjosa Berisha shpalosi detaje rreth sloganit zyrtar për këto dy ndeshje. Gjithashtu ajo bëri të ditur se vashat e Dardaneve do të jenë në një numër më të madh në stadium për këtë ndeshje.
Berisha: “Welcome and Respect” do të jetë slogani zyrtar
“‘Welcome and respect’ është slogani i mikpritjes dhe i respektit të Anglisë që do të vijë këtu, këtu përfshihen shumë aspekte. Normalisht mikpritja që është virtyt tradicional i yni në veçanti për tifozët e Anglisë të cilët kanë bërë shumë, është vendlindja e futbollit, është kombëtarja më e madhe që jemi duke e pritur në Kosovë dhe vendi ynë ka marrë shumë përkrahje prej tyre jo vetëm në aspektet tjera por edhe për pavarësinë e Kosovës”, tha Berisha.
Kosova të enjten zhvillon ndeshjen si mysafir ndaj Çekisë, ndërsa të dielën e pret Anglinë në Prishtinë.
