(E plotësuar) - Kryetari i Komunës së Prishtinës, Shpend Ahmeti, dhe asistenti i tij, Nezir Ismaili, sot janë kanosur.
Se ka ndodhur një kanosje ndaj një personi zyrtar në objektin e komunës së Prishtinës e ka konfirmuar edhe zëdhënësja e policisë për rajonin e Prishtinës, Flora Ahmeti.
“Sot rreth orës 11:00 në stacionin policor Qendra është iniciuar një rast “Kanosje ndaj personit zyrtar”. Rasti ka ndodhur në rrugën “UÇK” në Prishtinë, në objektin e Komunës, Me rastin po merren njësitet kompetente”, ka theksuar Ahmeti
***
Kryetari i Komunës së Prishtinës, Shpend Ahmeti duket se ka marrë një kërcënim serioz gjatë ditës së sotme.
Media ka mësuar se ky rast po konsiderohet si serioz, prandaj edhe është duke u marrë Policia e Kosovës.
E gjithë kjo dyshohet se ka ardhur pasi i pari i Prishtinës e ka anuluar një takim me një person në momentet e fundit.
Kjo duket se ka hidhëruar personin në fjalë, i cili pastaj edhe ka kërcënuar kryetarin përmes internetit.
“Një person fillimisht kishte lënë termin me kryetarin Shpend Ahmeti, ndërsa më pastaj ky i fundit nuk e ka pranuar dhe si pasojë i dyshimti e ka kanosur përmes internetit…”, ka thënë një zyrtar në kushte anonimiteti brenda komunës.
E siç mëson media nga burimet e veta, kërcënimi po konsiderohet si serioz nga autoritetet e rendit, prandaj edhe njësitet përkatëse policore janë duke u marrë me rastin.
Sipas burimeve, njësitet policore meqë e kanë të njohur personin që bëri kërcënimin, tani janë duke u munduar ta gjejnë atë.
Deri tani nuk janë dhënë detaje nga Komuna dhe Policia për gjithë këtë rast.
