Lëvizja Vetëvendosje, gjatë ditës së sotme ka publikuar fjalimin e liderit të tyre, Albin Kurtit, para partisë së tij, ku ka treguar se ka përafrim me LDK-në, por që nuk garanton marrëveshje.
Sipas komunikatës, Kurti ka treguar se i ka dhënë LDK-së një ofertë të re, të cilën LDK-ja do ta shqyrtojë në këshillin e saj, mirëpo nuk ka treguar se për çfarë oferte bëhet fjalë.
Por gazeta “Bota sot”, përmes burimeve brenda Lëvizjes Vetëvendosje, mëson se Kurti i ka ofruar LDK-së 7 ministri dhe postin e presidentit, po që një ministri duhet t’i kthehet LVV-së kur LDK-ja ta merr zyrtarisht postin e presidentit.
Të njëjtat burime i kanë thënë “Bota sot” se lideri i VV-së, Albin Kurti, nuk dëshiron në asnjë mënyrë që postin e kryetarit të Kuvendit ta kthejë në tavolinën e bisedimeve, post që tani i takon LVV-së dhe e mban Glauk Konjufca.
Gazeta "Bota sot" ka dërguar pyetje në zyrën për media të VV-së, ku ata nuk e kanë mohuar këtë lajm,e as pohuar.
"S'mund të them asgjë më shumë se fjalimi i Kryetarit Kurti që e ka mbajtur sot në mbledhje me qendrat", ka thënë zëdhënësi i VV-së, Arlind Manxhuka.
Ndryshe, LDK-ja pritet të mbledh nesër kryesinë e saj, për ta diskutuar ofertën e fundit.