Albulena Haxhiu, anëtarja e kryesisë së Lëvizjes Vetëvendosje i ka bërë thirrje Lidhjes Demokratike që t’a ri-mendojë edhe njëherë ofertën për koalicion qeverisës.
Haxhiu, përmes një shkrimi në Facebook ka thënë se pas dorëzimit të emrit të mandatarit është koha për ndryshim e formim të qeverisë.
Ajo ka thënë se për të jetësuar vullnetin e qytetarëve të shprehur më 6 tetor, Vetëvendosje ka bërë shumë kompromise, e sipas saj tani është radha që LDK, të tregojë se e do vërtetë ndryshimin.
“Sot, dorëzuam emrin e mandatarit. Mandatari ynë do të jetë ai që ka marrë mbështetjen më të madhe nga qytetarët e Republikës sonë më 6 tetor, Albin Kurti”, ka shkruar ajo.
Deputetja e Vetëvendosjes është shprehur se këto ditë janë ideale për të marrë vendimin historik në përputhje me vullnetin e qytetarëve.
“Jo më vonë se 15 ditë, kandidati ynë, duhet të paraqes përbërjen e Qeverisë para Kuvendit”, ka deklaruar ajo.