Aktivistja e Lidhjes Demokratike të Kosovës në Gjermani, Donika Gërvalla, ka dënuar sulmin ndaj zëvendëskryeministrit të Kosovës Avdullah Hotit.
Ajo ka thënë se LDK-ja e don progresin dhe shtetin ligjor, por ish-pushtetarët kanë instaluar anarkinë për të vjedhur, vrarë e shantazhuar.
Sipas saj, gjuajtja me vezë ndaj Hotit, tregon më qartë pse ishte i nevojshëm ndryshimi në Kosovë.
Por, ajo ka paralajmëruar se koha e tyre ka kaluar përfundimisht dhe të vetmit që ende nuk e kanë kuptuar sipas saj, janë ish-pushtetarët, përcjell Bota sot.
Postimi i Gërvallës në Facebook:
Ne jemi shumë më shumë se ju
Ne e duam dritën - ju errësirën për punët tuaja të shëmtuara;
Ne e duam progresin - ju të shkuarën gjatë së cilës keni vjedhur e mashtruar sipas qejfit;
Ne e duam shtetin ligjor - ju anarkinë që keni instaluar për të vjedhur, vrarë dhe shantazhuar;
Ne respektojmë guximin për të marrë vendimet e duhura për çlirimin e shtetit nga korrupsioni dhe krimi - ju kërcënoni ku të mundeni;
Ne kënaqemi kur qeveritarët tanë shëtisin rrugëve pa gorilla dhe xhipa të zinj - ju i gjuani me vezë dhe na e bëni edhe më të qartë se pse ishte kaq i domosdoshëm ndryshimi.
Mos harroni, ne jemi shumë më shumë se ju dhe kthim prapa nuk ka. Koha juaj ka kaluar përfundimisht dhe të vetmit që ende nuk e kanë kuptuar jeni ju.