Pas zërave nga Shtëpia e Bardhë, për mundësinë e heqjes së trupave amerikane nga Kosova, ka ardhur një reagim nga ana e kryeministrit, Albin Kurti.
Kurti është takuar të martën pasdite me Komandantin e Forcës së Sigurisë së Kosovës, Rrahman Rama.
Përmes një postimi në llogarinë e tij në Instagram, Kurti ka thënë se me Ramën, kanë biseduar për zhvillimin e FSK-së dhe mundësitë e reja për avancimin e saj e të cilat i hap programi qeverisës 2020-2023.
Në këtë shkrim, Kurti tha se me Rrahman Ramën për herë të parë është takuar gjatë luftës.
Të martën, senatori amerikan, David Perdue, tha se SHBA-ja do të duhej ta rishqyrtojë praninë e saj në Kosovë.
Sipas tij, “nëse Kosova nuk është plotësisht e përkushtuar për paqe, SHBA-ja ta rishqyrtojë praninë e saj atje”.
Edhe Donald Trump Junior, i biri i presidentit të SHBA-së, Donald Trump, ka kërkuar të martën tërheqjen e trupave amerikane nga Kosova.
