Kurti reagon pas deklaratës së Amerikës: Thirrjet e Thaçit dhe Vuçiqit vazhdojnë të jenë kërcënim

Aktuale

Kurti reagon pas deklaratës së Amerikës: Thirrjet e Thaçit dhe Vuçiqit vazhdojnë të jenë kërcënim

Nga: A.Zh Më: 27 mars 2020 Në ora: 18:42
Albin Kurti, kryeministër në detyrë

Qeveria e Kosovës në detyrë e udhëhequr nga Albin Kurti, ka reaguar pas deklaratës së përbashkët nga i dërguari i posaçëm presidencial, Richard Grenell, përfaqësuesi i posaçëm për Ballkanin Perëndimor, Matthew Palmer, dhe ambasadori amerikan, Philip Kosnett.

Qeveria ka thënë se kjo paraqet mbështetje dhe inkurajim dhe se është tejet i rëndësishëm fakti se në Deklaratën e Përbashkët thuhet se nuk ekziston një plan i fshehtë për ripërcaktim kufijsh dhe Grenell, nuk e ka parë dhe as diskutuar një plan të tillë.

Por, sipas ekzekutivit, “thirrjet e vazhdueshme të Presidentëve Thaçi dhe Vuçiq për korrigjim kufijsh me kompromis të dhimbshëm, vazhdojnë të jenë kërcënim dhe që nga gushti i vitit 2018, ato janë përsëritur nga dy presidentët”, përcjell Bota sot.

Qeveria ka akuzuar se dy presidentët kanë vendosur lidhje të shkurtër me njëri-tjetrin pa ndërmjetësim ndërkombëtar.

“Për ne thirrjet e vazhdueshme të Presidentëve Thaçi dhe Vuçiq (korrigjim kufijsh me kompromis të dhimbshëm, veriu si dhuratë e Rankoviqit, razgraničenje, etj.) vazhdojnë të jenë kërcënim, dhe që nga gushti i vitit 2018, ato janë përsëritur nga dy presidentët të cilët kanë vendosur lidhje të shkurtër me njëri-tjetrin pa ndërmjetësim ndërkombëtar”, thuhet në reagimin e lëshuar nga Qeveria.

Qeveria ka theksuar se dialogu i udhëhequr nga Kryeministri i Kosovës, duhet të rifillojë i përgatitur mirë, me qëllim njohjen e ndërsjelltë.

Komunikatë nga Qeveria në detyrë e Republikës së Kosovës:

Prishtinë, 27 mars 2020

Qeveria në detyrë e Republikës së Kosovës e vlerëson Deklaratën e Përbashkët nga i dërguari i posaçëm presidencial, Richard Grenell, përfaqësuesi i posaçëm për Ballkanin Perëndimor, Matthew Palmer, dhe ambasadori amerikan, Philip Kosnett, si rikonfirmim se Shtetet e Bashkuara të Amerikës do të vazhdojnë të jenë pranë popullit të Kosovës, dhe se ato mbështesin angazhimin e institucioneve tona shëndetësore për tejkalimin e situatës me COVID-19. Në të njëjtën kohë, thirrjet e tyre për t’u respektuar Kushtetuta, çmohen po aq lart.

Mbi çështjen e tarifës, me vendimin e Qeverisë së datës 20.03.2020 kemi bërë një hap të rëndësishëm duke liruar nga tarifa 100% produktet e lëndës së parë të cilat importohen nga Serbia dhe Bosnjë-Hercegovina.

Për Qeverinë në detyrë të Republikës së Kosovës është tejet i rëndësishëm fakti se në Deklaratën e Përbashkët thuhet se nuk ekziston një plan i fshehtë për ripërcaktim kufijsh dhe se i dërguari i posaçëm presidencial, Richard Grenell, nuk e ka parë dhe as diskutuar një plan të tillë.

Kjo paraqet një mbështetje dhe inkurajim për Qeverinë në detyrë. Por, për ne thirrjet e vazhdueshme të Presidentëve Thaçi dhe Vuçiq (korrigjim kufijsh me kompromis të dhimbshëm, veriu si dhuratë e Rankoviqit, razgraničenje, etj.) vazhdojnë të jenë kërcënim, dhe që nga gushti i vitit 2018, ato janë përsëritur nga dy presidentët të cilët kanë vendosur lidhje të shkurtër me njëri-tjetrin pa ndërmjetësim ndërkombëtar.

Dialogu në mes të Kosovës dhe Serbisë duhet të udhëhiqet nga Qeveria, përkatësisht Kryeministri i Republikës së Kosovës, sipas parimeve kushtetuese të Republikës së Kosovës. Dialogu duhet të rifillojë i përgatitur mirë, të ketë qëllim njohjen e ndërsjelltë si dy shtete sovrane dhe me integritet territorial, për marrëveshje të qëndrueshme si garant për normalizim të marrëdhënieve bilaterale dhe paqe e siguri në rajon.​

commentFirst article
Sot mund të lexoni Shfletoni kopertinat