​Analistët për Samitin e Zagrebit: Pandemia lë nën hije liberalizimin e vizave për Kosovën

Aktuale

​Analistët për Samitin e Zagrebit: Pandemia lë nën hije liberalizimin e vizave për Kosovën

Më: 5 maj 2020 Në ora: 16:21
​Analistët për Samitin e Zagrebit: Pandemia lë nën hije liberalizimin e vizave për Kosovën

Nesër do të mblidhen krerët e shteteve të BE-së dhe ata të Ballkanit Perëndimor në Zagreb të Kroacisë. Në këtë Samit përveç diskutimit për rimëkëmbjen ekonomike pas pandemisë pritet të bëhet e qartë se përmbyllja e dialogut Kosovë-Serbi mund të arrihet vetëm nga BE-ja.

Ndonëse ky Samit është përmendur si mundësi për liberalizim të vizave për Kosovën, gjasat për një gjë të tillë njohësit e integrimeve ndërkombëtare i konsiderojnë si “zero”. Për shkak se pandemia do të marrë epiqendrën e Samitit.

Drejtori i Institutit “EPIK”, Demush Shasha thotë për KosovaPress se mesazh i mirë për Kosovën është largimi i vetos për pjesëmarrje nga Spanja.

Sipas tij është një sinjal i rëndësishëm i përafrimit të qëndrimit të Spanjës me vendet anëtare të BE-së sa i përket pranimit të pavarësisë së Kosovës.

Shasha: Do të bëhet e qartë se dialogu Kosovë-Serbi fasilitohet nga BE-ja

“Pres që liderët do të bëjnë të qartë se ekziston një dialog për normalizimin e marrëdhënieve mes Kosovës dhe Serbisë dhe ai dialog fasilitohet nga BE-ja”, tha ai.

Krahas kësaj, Shasha u shpreh skeptik për mundësitë që liberalizimi i vizave të ndodh këtë vit.

Shasha: Në asnjë formë nuk diskutohet liberalizimi i vizave, gjasat për këtë janë zero

“Në asnjë formë nuk diskutohet liberalizimi i vizave, gjasat për këtë janë zero. Kjo nuk është temë e samitit. Gjasat për liberalizim të vizave përtej samitit, me kalimin e çdo ditë të vitit 2020 po zbehen çdo ditë e më shumë. Andaj nuk duhet pritur asgjë konkrete nga samitit për liberalizim të vizave”, thotë ai.

Ndërsa, njohësi i tjetër i integrimeve evropiane, Besnik Vasolli thotë se ky samit do të jetë nën hijen e pandemisë Covid 19.

Vasolli: Për shkak të pandemisë Kosova nuk do të jetë në epiqendër të Samitit

“Samiti do të jetë nën hijen e virusit Covid, situatës në të cilën jemi duke kaluar, posaçërisht do të diskutohet për postCovid. Gjendjen ekonomike si të menaxhohet më mirë dëmtimi që veç ka ndodhur prej pandemisë. Si mundet BE-ja të kontribuoj në zbutjen e konsekuencave të pandemisë...për fat të keq të pandemisë samiti do të këtë më pak efekt se sa është pritur në fillim. Kjo për fat të keq edhe tonin, ne këtu do të kërkonim ose të ishim më në qendër të vëmendjes me të gjitha ato sfida dhe probleme që ballafaqohemi si vend”, thotë ai.

Kosovën në këtë samit virtual pritet të përfaqësojë presidenti, Hashim Thaçi.

commentFirst article
Sot mund të lexoni Shfletoni kopertinat