Drejtori i Agjencisë për Administrimin e Pasurisë së Sekuestruar ose të Konfiskuar Rrahim Rama është larguar nga puna, me vendimin e Komisionit Disiplinor për Pozitat e Nivelit të Lartë Drejtues, përcjell Bota sot.
Lajmin e ka bërë të ditur ministrja e drejtësisë, Albulena Haxhiu, e cila ka thënë se arsyet janë keqmenaxhimi, joprofesionalizmi, mungesa e transparencës, si dhe mosgatishmërisë për bashkëpunim në kryerje të detyrave të tij ligjore dhe se ai ishte zgjedhur në mënyrë të kundërligjshme.
Postimi i saj i plotë në Facebook:
Me 7 prill 2020, kemi iniciuar procedurën disiplinore ndaj drejtorit të përgjithshëm të Agjencisë për Administrimin e Pasurisë së Sekuestruar ose të Konfiskuar.
Më 17 prill 2020, Qeveria mori vendim për themelimin e Komisionit për shqyrtimin e këtij rasti.
Sot, u njoftuam se mbi bazën e të gjeturave tona, Komisioni Disiplinor për Pozitat e Nivelit të Lartë Drejtues, ka shqiptuar masën disiplinore “Ndërprerje e marrëdhënies së punës” për drejtorin e kësaj Agjencie, për shkak të keqmenaxhimit, joprofesionalizimit, mungesës së transparencës, si dhe mosgatishmërisë për bashkëpunim në kryerje të detyrave të tij ligjore. Po ashtu i njëjti ishte zgjedhur në mënyrë të kundërligjshme.