Prokuroria siguron prova të rëndësishme për vrasjen e familjes Jashari

Aktuale

Prokuroria siguron prova të rëndësishme për vrasjen e familjes Jashari

Më: 28 maj 2020 Në ora: 09:52
Prekaz

Hetimet për vrasjen e komandantit të Ushtrisë Çlirimtare të Kosovës, Adem Jashari, dhe 58 anëtarëve të familjes së tij nga forcat serbe në vitin 1998 janë duke vazhduar nga Prokuroria Speciale e Kosovës.

Deri më tani, Prokuroria Speciale ka intervistuar dëshmitar të shumtë dhe ka grumbulluar prova të rëndësishme që çojnë në zbardhjen e një prej krimeve më të rënda gjatë luftës në Kosovë.

Këtë e ka konfirmuar prokurorja speciale Drita Hajdari e cila tha se janë në fazën e hetimeve dhe nuk mund të japin më shumë detaje lidhur me rastin.

“Deri tani janë intervistuar dëshmitarë të shumtë dhe janë siguruar provat të rëndësishme për zbardhjen e plotë të rastit. Për shkak të interesit të hetimit nuk mund t’ju japim më shumë detaje për rastin në fjalë”, tha prokurorja Hajdari për arbresh.

Hajdari më tej ka konfirmuar se Prokuroria Speciale ka kërkuar nga Policia e Kosovës konkretisht nga Njësia për Hetimin e Krimeve të Luftës, grumbullimin e provave dhe informatave.

“Ju njoftoj se Prokuroria Speciale e Republikës së Kosovës, ka kërkuar nga Policia e Kosovës, Njësia për Hetimin e Krimeve të Luftës, grumbullimin e provave dhe informative relevante për rastin e krimeve të luftës, e kryer në muajin mars të vitit 1998 në fshatin Prekaz”, tha ajo.

Ndër të intervistuarit është edhe e mbijetuara e vetme e masakrës së Jasharëve, Besarta Jashari.

Në një përgjigje Besarta Jashari ka konfirmuar se është intervistuar një herë nga dy policë.

“Jam intervistuar nga dy policë, kanë ardhë tek puna dhe m’kanë intervistuar. Nuk m’kanë pyet në detaje. Është dashtë më herët të merren institucionet me këtë rast, por prap më mirë është tani se kurrë”, tha Besarta Jashari.

Por e mbijetuara e këtij krimi nuk pret rezultate nga këto hetime.

“Po pres që të dënohen kriminelët serbë që kryen krime. Nuk pres shumë nga këto hetime sepse që sa vite deri tash është dashtë dikush të dënohet”, u shpreh Jashari.

Gjatë betejës në Prekaz e cila zgjati tri ditë, u vranë 58 persona, prej të cilëve 22 ishin familjarë të ngushtë të Adem Jasharit. Në mesin e të vrarëve kishte edhe shumë fëmijë.

Shfaq komentet
comments powered by Disqus
Sot mund të lexoni Shfletoni kopertinat