Hashim Thaçi e akuzoi Shkëlzen Gashin, reagon ashpër ky i fundit, ia përmend Gjergj Dedajn dhe Specialen - Bota Sot
Hashim Thaçi e akuzoi Shkëlzen Gashin, reagon ashpër ky i fundit, ia përmend Gjergj Dedajn dhe Specialen

Aktuale

Hashim Thaçi e akuzoi Shkëlzen Gashin, reagon ashpër ky i fundit, ia përmend Gjergj Dedajn dhe Specialen

Nga: N.Sh Më: 28 maj 2020 Në ora: 11:45
Hashim Thaçi dhe Shkëlzen Gashi

Presidenti i Kosovës, Hashim Thaçi e ka akuzuar mbrëmë në një emision televiziv ish-këshilltarin e kryeministrit në detyrë Albin Kurtit, Shkëlzen Gashi që e ka quajtur UÇK-në terroriste dhe ushtarët e UÇK-së kriminelë.

Gashi ka reaguar pas kësaj deklarate ku thotë se asnjëherë nuk e ka quajtur UÇK-në terroriste dhe as ushtarët e UÇK-së kriminelë.

Gashi thotë se lufta e UÇK-së ishte e drejtë sepse ishte çlirimtare, por shton se UÇK-ja ka bërë gabime. E gabimi kryesor sipas tij, ishte që e ka pranuar të ketë drejtor politik Hashim Thaçin.

Tutje Gashi në reagimin e tij në Facebook, shkruan se, Thaçi kishte premtuar se do ta padisë Dick Martyn por që nuk ndodhi kurrë.

Ai ia ka përmendur edhe Gjergj Dedajn presidentit Thaçi i cili e kishte akuzuar publikisht presidentit se gjatë luftës e kishte maltretuar dhe torturuar mirëpo që më pas e bëri 4 herë zëvendësministër e pastaj edhe ambasador në Maqedoni e krejt në fund edhe e dekoroi.

Postimi i plotë:

Hashim Thaçi, Dick Marty, Gjergj Dedaj dhe Gjykata Speciale

Presidenti i Kosovës, z. Hashim Thaçi, mbrëmë në emisionin Debat Plus të TV Dukagjinit deklaroi se «…këshilltari i Kryeministrit të Kosovës e ka quajtur UÇK-në terroriste dhe ushtarët e UÇK-së kriminelë». Nuk kam deklaruar asnjëherë se UÇK-ja ishte terroriste, e as se ushtarët e UÇK-së ishin kriminelë. Përkundrazi. E përsëris deklaratën time: «Pjesëtarë / individë nga radhët e UÇK-së, madje me pozita të larta, sipas raporteve të organizatave prestigjioze ndërkombëtare dhe vendimeve të gjykatave ndërkombëtare, kanë qenë të përfshirë në krime».

Natyrisht, lufta e UÇK-së ishte e drejtë, sepse ishte çlirimtare. A ka bërë UÇK-ja gabime? Sigurisht që ka bërë dhe për këto gabime duhet të diskutojmë. Ta zëmë, gabimi i saj i parë dhe kryesor ishte që ka pranuar ta ketë drejtor politik Hashim Thaçin.

Presidenti Thaçi në intervistën e mbrëmshme e përmendi Raportin e Dick Marty-t. Duhet thënë se në atë raport, Hashim Thaçi përmendet plot 26 herë. Pas publikimit të këtij raporti, z. Hashim Thaçi, atëherë Kryeministër i Kosovës, pati paralajmëruar se do ta padiste Dick Marty-n për shpifje. Kuptohet, lëre që nuk e paditi asnjëherë, por madje e themeloi Gjykatën Speciale mbi bazën e Raportit të Dick Marty-t.

Edhe diçka. Kryetari i Partisë Liberale të Kosovës, z. Gjergj Dedaj, e ka akuzuar publikisht Hashim Thaçin duke thënë se gjatë luftës në Kosovë e pati torturuar fizikisht atë dhe disa veprimtarë të LDK-së. Hashim Thaçi iu përgjigj këtyre akuzave duke e emëruar Gjergj Dedajn katër herë zëvendës-ministër: në Ministrinë e Punës dhe Mirëqenies Sociale (2008); në Ministrinë e Kulturës, Rinisë dhe Sportit (2013); në Ministrinë e Administrimit të Pushtetit Lokal (2015) dhe së fundmi në Ministrinë e Punëve të Jashtme (2017). Më vonë, në vitin 2018, Presidenti Thaçi e dekoroi Dedajn me Medaljen Presidenciale në 10-vjetorin e Pavarësisë së Republikës së Kosovës, e më pas, po më 2018, e caktoi Ambasador të Jashtëzakonshëm Fuqiplotë në Shkup.

Pra, Hashim Thaçi nuk e paditi Dick Marty-n, e themeloi Gjykatën Speciale, e emëroi, e dekoroi dhe e dekretoi Gjergj Dedajn. Me të gjitha këto, ai i pranoi akuzat se ka bërë shkelje të rregullave të së drejtës humanitare ndërkombëtare.

Shfaq komentet
comments powered by Disqus
Sot mund të lexoni Shfletoni kopertinat