(E plotësuar) - Lëvizja Vetëvendosje ende nuk e ka vendosur nëse do t’i kërkojë dorëheqjen nga posti i kryetares së Kuvendit, Vjosa Osmanit. Përkundër që shprehën fjalë të mira për punën e kryeparlamentares, në partinë e Albin Kurtit thonë se për këtë post do të diskutohet në kryesi dhe pastaj të veprohet tutje.
Derisa nga shoqëria civile pohojnë se posti i kryetarit të Kuvendit mund të kontestohet në Gjykatën Kushtetuese, pasi nuk dihet a i takon automatikisht grupit më të madh parlamentar pas konstituimit të Kuvendit.
Nënkryetarja e Kuvendit të Kosovës nga radhët e Lëvizjes Vetëvendosje, Arbërie Nagavci thotë për KosovaPress se kreu i legjislativit nuk mund të kontestohet se i takon partisë së saj.
Nagavci: Në parti ende nuk kemi diskutuar për postin e kryeparlamentares
“Në Lëvizje nuk e kemi diskutuar postin e kryeparlamentares. Ne ia vlen të përmendim që ka pasur një bashkëpunim shumë parimor. Një bashkëpunim që vërtet ka qenë i bazuar në parime dhe bindje tona që po punojmë në realizimin e synimit tonë... nëse ka një diskurs të tillë kjo tregon se në apetitet e tyre për të uzurpuar gjithçka kanë synim edhe në këtë drejtim. Është një çështje që nuk mund të kontestohet”, tha Nagavci.
Nga shoqëria Civile, Arbëresha Loxha thotë se posti i kryeparlamentares pas dorëheqjes ose shkarkimit të Vjosa Osmanit mund të kontestohet në Gjykatën Kushtetuese.
Loxha: Është kontestuese se kujt i takon posti i kryeparlamentarit pas konstituimit të Kuvendit
“Ne mendojmë që është kontestuese se kujt i takon pozita e kryeparlamentarit. Nëse i takon partisë më të madhe, apo grupit më të madh parlamentar. Tashmë pasi Kuvendi është i konstituuar. Ne konsiderojmë që ky mund të jetë një rast i ri për Gjykatën Kushtetuese, i cili mund të dërgohet në Gjykatë meqenëse kemi të bëjmë me një rast të kontestuar, i cili pra nuk na është paraqitur në të kaluarën. Nuk ka të bëjë me zgjedhjen e kryeparlamentarit para krijimit të qeverisë dhe konstituimit të kuvendit pas zgjedhjeve, por e kemi atë pas konstituimit. Pra, nuk është rasti i njëjtë sikur në rastin e VLAN-it”, tha ajo.
Ndërsa, Albert Krasniqi nga Demokracia Plus, thotë për KosovaPress se edhe në rast të dorëheqjes së kryeparlamentares Vjosa Osmani nuk mund të zvarritet formimi i qeverisë së re, pasi Kuvendi udhëhiqet nga nënkryetarja e tij.
Krasniqi: Edhe nëse jep dorëheqje, Osmani do të zëvendësohet nga njëri prej nënkryetarëve
“Zonja Osmani si kryetare e Kuvendit ka për obligim që të mundësojë realizimin e seancës në të cilën do të bëhet zgjedhja e qeverisë. Për shkak se është detyrim i saj kushtetues...Nëse ajo do të zgjedhë të jep dorëheqje prej postit të kryetares së Kuvendit është çështje e saj. Pastaj i takon LVV-së që të propozojë një kandidat tjetër për kryetar të Kuvendit. Mirëpo rregullorja e punës së Kuvendit parasheh se në rast të mungesës së kryetarit të Kuvendit, një prej nënkryetarëve do ta zëvendësojë deri në zgjedhje të kryetarit të ri”, tha Krasniqi.
Media ka provuar të marrë një përgjigje edhe nga zyra e kryeparlamentarës Osmani për këtë çështje, por nuk kanë kthyer përgjigje.
VV-ja nuk e ka në plan t’ia kërkojë dorëheqjen Osmanit
Vetëvendosje mund të mbetet pa asnjë post të lartë institucional, ani pse doli partia e parë në zgjedhjet e 6 tetorit.
Pavarësisht nëse votohet Qeveria e re me Avdullah Hotin kryeministër, kjo parti nuk e ka në plan t’ia kërkoj dorëheqjen kryetares së Kuvendit Vjosa Osmani.
Nënkryetarja e Kuvendit nga radhët e Vetëvendosjes, Arbërie Nagavci, ka thënë se kjo nuk është diskutuar fare në parti, edhe për faktin e bashkëpunimit tejet të mirë me Osmanin.
“Nuk e kemi diskutuar këtë në parti. Kjo edhe për shkak se me zonjën Vjosa Osmani kemi bashkëpunim në nivelin më të mirë të mundshëm. Bashkëpunimi ka qenë i shkëlqyer edhe në nivel të institucioneve, Kuvend dhe Qeveri. Pra, edhe me kryeministrin Kurti”, ka thënë Nagavci.
Anëtarja e Kryesisë së Vetëvendosjes, thotë se do të varet edhe nga vullneti i nënkryetares së LDK-së Vjosa Osmani, nëse do të vazhdojë të mbetet kryeparlamentare. Vjosa Osmani ishte zgjedhur kryetare e Kuvendit, pasi ishte propozuar për këtë post nga Vetëvendosje, pas marrëveshjes për bashkëqeverisje që kjo parti kishte arritur me LDK-në.
Këto dy parti ndanë rrugët në Qeveri, pasi LDK-ja inicioi mocionin për rrëzimin e Qeverisë së udhëhequr nga Albin Kurti më 25 mars.
