Arbërie Nagavci, nënkryetarja e Kuvendit të Kosovës dhe njëherësh edhe nënkryetarja e VV-së, ka reaguar ndaj vendimit të Qeverisë Hoti për heqjen e reciprocitetit ndaj Serbisë.
Përmes një postimi në llogarinë e saj në Facebook, Nagavci ka shkruar se kjo është një qeveri jolegjitime derisa vendimin e sotëm e ka quajtur qyqarë.
“Qeveria jolegjitime mori vendim për heqjen e reciprocitetit me Serbinë. Zatën nga njerëz pa integritet nuk mund të presësh as ruajtje të sovranitetit të vendit. Në mënyrë të turpshme erdhët në pushtet, i turpshëm e qyqar vendimi i sotëm”, ka shkruar Nagavci.
Qeveria Hoti ka shfuqizuar sot vendimet përmes së cilave është vendosur masa e reciprocitetit me Serbinë.
Nën udhëheqjen e kryeministrit Hoti, ekzekutivi ka shfuqizuar vendimin e datës 20 mars 2020 të qeverisë së kaluar Kurti për zbatimin gradual të reciprocitetit me Serbinë dhe vendimin e datës 30 maj 2020, për plotësim ndryshimin e vendimit të parë për këtë masë.
Kryeministri Avdullah Hoti e ka quajtur vendim të rëndësishëm heqjen e reciprocitetit. Ai në një konferencë për media ka thënë se presin që edhe pala serbe t’i heq pengesat në mënyrë që t’i lihet rrugë vazhdimit të dialogut.