Sonte në mbrëmje pritet të dalin rezultatet e 20 të testuarve për koronabirus nga Komuna e Obiliqit.
Mbrëmë në këtë komunë, ka rezultuar pozitiv me COVID-19 një person, ndërsa sot në pritje të rezultatit të testit janë edhe 20 të tjerë.
Kështu ka bërë të ditur kryetari i komunës së Obiliqit, Xhafer Gashi i cili tha se aktualisht gjendja me COVID-19 në këtë komunë është e menaxhueshme dhe se aktiv në këtë komunë me këtë virus janë edhe 8 persona.
Ai thotë se këto 8 raste përfshijnë 2 familje dhe se gjendja e tyre shëndetësore është e mirë.
“E kemi një rast që ka qenë rast kontakti me Klinikën Gjinekologjike në Prishtinë dhe pastaj e kem edhe një rast tjetër që është bartur nga një person kontakti në KEK dhe tani dje është bërë edhe hulumtimi me personat tjerë kontaktues dhe nga rezultatet e fundit i kemi edhe gjashtë të tjerë kryesisht janë familjar, rastet e fundit dhe shpresojmë të përmbyllet me aq… Gjendja shëndetësore e tyre është relativisht e qetë, IKSHP po bënë përpjekje maksimale për identifikimin e rasteve të kontaktit të tjera dhe shpresojmë që edhe sot i kemi 20 veta në test në IKSHP dhe të shohim rezultatet përfundimtare”, theksoi Gashi .
Ai tha se qytetarët janë relaksuar mjaftë shumë ndonëse edhe pjesëtarë të Inspektoratit dhe Policisë së Kosovës janë duke e kryer punën e tyre.
“Vërehet dukshëm një lëvizje e lirë e qytetarëve edhe të lë përshtypjen sikurse ditë e zakonshme…Edhe inspektorët dhe policia janë duke e bërë të njëjtën punë por duhet të plotësohet me ligje të reja të cilat janë mundësi që edhe komunat të nxjerrin rregullore, pastaj për të shqiptuar edhe gjoba. Njëherë për njëherë janë duke bërë lëvizje por ju e dini që vendimet e mëhershme antikushtetuese dhe shpesh edhe vetë qytetarët por i përdorin këto sikur njëfarë forme kot më gjobit unë do vazhdoj, gjë që nuk është e mirë sepse nuk mendoj që gjoba duhet të jetë ajo që e ndalon një qytetar”, tha Gashi për KP.
Nga 13 marsi kur edhe u shënua rasti i parë me COVID-19 në Kosovë e deri më tani kanë rezultuar pozitiv me këtë pandemi 1263 persona, prej tyre 912 janë shëruar kurse 31 kanë vdekur.
