Presidenti Thaçi, kohët e fundit ka hedhur kritika në drejtim të Bashkimit Evropian sa i përket qasjes së tyre ndaj Kosovës.Thaçi madje nuk e ka pritur me entuziazëm as vizitën e të dërguarit të posaçëm të BE-së për dialogun Kosovë-Serbi, Miroslav Lajçak.
E kjo qasje e Thaçit sipas njohësit të çështjeve politike, Dorajet Imeri ka të bëjë me faktin se ai nuk e do më në këtë proces, Bashkimin Evropian.
Imeri ka theksuar se Bashkimi Evropian nuk do të jetë më faktor në procesin e dialogun, e kjo për faj të tyre.
“Është i pashembullt rasti kur në një proces të vetëm bisedimesh, të ketë më shumë se një palë lehtësuese, pra dikur BE si e vetme dhe tash SHBA. Qëndrimi i Thaçit është i qartë, ai më nuk do të negociojë me me asnjë përfaqësues që është nga Evropa. As me Lajcak-un, madje as kryeministri Hoti, ose thënë ndryshe, BE nuk do të jetë më faktori kryesor, siç ka qenë deri tash, pikërisht me fajin e saj. BE nuk ka arritur t’i jep një epilog bisedimeve, për shkak të vetë natyrës së funksionimit të saj”
Tutje Imeri thotë se marrëveshja Kosovë-Serbi është afër, por një marrëveshje e tillë nuk do ta zgjidhë problemin në mes Kosovës dhe Serbisë.
“Marrëveshja, për mendimin tim është afër, por në të njëjtën kohë, marrëveshja nuk do ta zgjidh problemin në mes Kosovës dhe Serbisë. Serbia historikisht ka përdorur një strategji që për fat te keq edhe ka funksionuar, duke e kontestuar çdo arritje politike të Kosovës. Parë në rrafshin historik, Serbia ka dashur që Kosovën ta paraqes si një konflikt i vazhdueshëm, pa zgjidhje dhe si vend i gjenerimit të krizave. Në anën tjetër, e ka përdoruar dialogun, për të krijuar përshtypjen se është e interesuar për paqe e stabilitet. Marrëveshja me Serbinë, nëse nuk përfshin korrigjimet e kufirit, do të jetë një Ahtisari plus, me një asociacion që do të ketë kompetenca të zgjeruara dhe një status më ta avancuar për institucionet e kultit, si manastiret, të cilat do të kenë eksterritorialitet” tha Imeri.
Me 27 Qershor, në Uashington, pritet të mbahet një takim ndërmjet delegacionit kosovar dhe atij serb si përpjekje për gjetjen e një zgjidhjeje përfundimtare për marrëveshjen Kosovë-Serbi.Për të diskutuar më gjerësisht rreth procesit të dialogut dhe hapat që do të ndiqen, për një vizitë 3 ditore në Kosovë po qëndron edhe i dërguari i BE-së për dialogun, Miroslav Lajçak.Lajçak ditën e djeshme ka zhvilluar takim me Presidentin, Hashim Thaçi, kryetaren e Kuvendit, Vjosa Osmani dhe Kryeministrin Avdullah Hoti.
