Dy gjyqtarë të kolegjit tregojnë për rrethana që i lidhin me një të akuzuar në rastin “Pronto”, mbrojtësit nuk kanë vërejtje

Aktuale

Dy gjyqtarë të kolegjit tregojnë për rrethana që i lidhin me një të akuzuar në rastin “Pronto”, mbrojtësit nuk kanë vërejtje

Më: 17 qershor 2020 Në ora: 11:24

Dy gjyqtarët të kolegjit të Apelit, Burim Ademi dhe Ferit Osmani, para fillimit të referimit të ankesës në rastin e njohur si “Pronto”, bënë të ditur se me të akuzuarin Sadat Gashi, e kanë nga një rrethanë e cila i lidh nga e kaluara.

Gjyqtari Burim Ademi, i cili është edhe gjyqtar raportues për këtë rast, tha se në të kaluarën kanë jetuar në të njëjtin vendbanim me të akuzuarin Gashi dhe për këtë rrethanë tha se është i njoftuar edhe kryetari i Gjykatës së Apelit.

Mirëpo, siç tha Ademi, nuk kemi të bëjmë me një rrethanë e cila kërkon përjashtimin e tij nga kolegji, raporton “Betimi për Drejtësi”.

Edhe gjyqtari tjetër i kolegjit, Ferit Osmani tha se me të akuzuarin Gashin ka një lidhje përmes bashkëshortes dhe një kushëririt të tij, mirëpo edhe Osmani tha se nuk ka bazë për përjashtim të detyruar të tij dhe se për këtë rrethanë tha se është në dijeni edhe kryetari i Gjykatës së Apelit.

Gjyqtari Osmani tha se do të ishte e rrugës që edhe Prokurori i Apelit të ishte në seancë, që të deklarohej lidhur me këto rrethana, mirëpo nga Prokuroria e Apelit nuk është duke prezantuar askush.

Të dy gjyqtarët thanë se treguan këto rrethana për shkak të transparencës, duke kërkuar edhe mendimin e të akuzuarve se nëse kanë vërejtje lidhur me përbërjen e kolegjit.

Përkundër kësaj, të gjithë të akuzuarit dhe mbrojtësit e tyre thanë se nuk kanë vërejtje në përbërjen e kolegjit.

Ndryshe, në këtë seancë të kolegjit po shqyrtohet ankesa e Prokurorisë Speciale të Republikës së Kosovës (PSRK) për rastin “Pronto”.

Në këtë rast, Departamenti Special i Gjykatës së Apelit, pritet të vendos lidhur me ankesën e ushtruar nga PSKR, kundër aktgjykimit të gjykatës së shkallës së parë, me të cilin 11 të akuzuarit e rastit “Pronto” ishin liruar nga akuza.

Në seancë janë të pranishëm Adem Grabovci, Besim Beqaj, Nijazi Kryeziu dhe disa të akuzuar tjerë me avokatët mbrojtës të tyre, ndërsa nga organi i akuzës, përkatësisht nga Prokuroria e Apelit nuk është duke prezantuar askush.

Kolegji i Apelit në këtë rast, është në përbërje nga gjyqtarët, Vaton Durguti, Burim Ademi dhe Ferit Osmani.

Gjykata Themelore në Prishtinë, me 3 janar të këtij viti kishte shpallur aktgjykim lirues ndaj 11 të akuzuarve në rastin e njohur “Pronto”.

Ish-deputeti i Partisë Demokratike të Kosovës, Adem Grabovci, ish-ministri i Inovacionit dhe Ndërmarrësisë, Besim Beqaj, ish-deputeti i PDK-së, Zenun Pajaziti dhe tetë të akuzuarit tjerë janë shpallur të pafajshëm për veprën penale “shkelja e statusit të barabartë të shtetasve dhe banorëve të Republikës së Kosovës në bashkëkryerje”.

Sipas kryetarit të trupit gjykues, gjykatësit Shashivar Hoti, nuk është provuar se të akuzuarit kanë kryer veprën penale më të cilën ngarkohen.

Ndryshe, gjykimi për këtë rast ka nisur më 15 nëntor 2018, ku në seancën fillestare të akuzuarit ishin deklaruar të pafajshëm.

Tutje, në seancën që ishte mbajtur më 4 shkurt 2019, mbrojtja e të akuzuarve Adem Grabovci, Besim Beqaj, Zenun Pajaziti dhe të tjerëve në rastin e njohur “Pronto”, e kishte kundërshtuar aktakuzën.

Mirëpo Gjykata Themelore në Prishtinë, më 3 prill 2019, e kishte konfirmuar aktakuzën ndaj Adem Grabovcit, Besim Beqajt, Zenun Pajazitit dhe të tjerëve në rastin e njohur “Pronto”, pasi që kishte refuzuar kërkesën e mbrojtjes për hudhjen e aktakuzës dhe kundërshtimin e provave.

Në mesin e 11 të akuzuarve janë, ish-shefi i grupit parlamentar të PDK-së, Adem Grabovci, ish-ministri i Inovacionit dhe Ndërmarrësisë, Besim Beqaj, deputeti aktual i PDK-së, Zenun Pajaziti, ish-kryesuesi i Kuvendit të Komunës së Prizrenit, Nijazi Kryeziu, ish-shefja e Njësisë për furnizim në Ministrinë e Shëndetësisë, Arbenita Pajaziti, ish-sekretari i Ministrisë së Punëve të Brendshme, Ilhami Gashi, ish-zëvendësministri i Punës dhe Mirëqenies Sociale, Fatmir Shurdhaj, ish-këshilltari politik në MPB, Sedat Gashi, Ismet Neziraj, Xhavit Dakaj dhe Rexhë Abazi.

Ata akuzohen për kryerjen e veprës penale “Shkelja e statusit të barabartë të shtetasve dhe banorëve të Republikës së Kosovës në bashkëkryerje”, nga neni 193 paragrafi 4 lidhur me paragrafin 1 të KPRK-së, lidhur me nenin 31 të KPRK-së, prej të cilave disa prej veprave kanë mbetur në tentativë.

Sipas aktakuzës, të pandehurit kanë keqpërdorur pozitat e tyre zyrtare duke bashkëpunuar në mes vete për dhënien e privilegjeve dhe përparësive kundërligjshme personave të cilët kanë konkurruar në funksione të rëndësishme, siç janë: drejtor për Ndërmarrjet publike qendrore, Kryeshef Ekzekutiv i Agjencisë së Regjistrimit në Ministrinë e Punëve të Brendshme, Kryeshef i Agjencisë për produkte medicinale dhe Koordinator i Qendrës së Regjistrimit Civil në Komunën e Klinës, duke mohuar dhe kufizuar liritë dhe të drejtat e kandidatëve të tjerë, të garantuara me ligj. Në aktakuzë është trajtuar çështja penale e punësimeve dhe ndarjes së posteve, të bazuara në përkatësinë partiake dhe raporte personale, për të cilin problem për një kohë të gjatë alarmojnë qytetarët e Kosovës, Agjencitë për zbatimin e ligjit si dhe mediat dhe shoqëria civile.

Ky rast ishte publikuar nga mediat publike, duke zbuluar veprimet dhe metodat e punësimit brenda grupeve të ngushta interesi, në bazë të së cilës është nisur hetimi i prokurorisë, i cili rezultoi me ngritjen e aktakuzës.

Kjo vepër për të cilën akuzohen këta zyrtarë dhe ish-zyrtarë, sipas nenit 193, paragrafit 4 të Kodit Penal të Republikës së Kosovës, është e dënueshme prej 6 muaj deri në 5 vjet burgim. Protagonisti kryesor i asaj që është quajtur si “Afera Pronto”, ka qenë ish-deputeti i Partisë Demokratike të Kosovës (PDK), Adem Grabovci.

Në vitin 2011, për herë të parë ishin publikuar në media bisedat nga disa përgjime të EULEX-it, e ku Grabovci dëgjohej duke biseduar ndër të tjerash edhe me presidentin aktual Hashim Thaçin, kryeparlamentarin Kadri Veseli dhe persona të tjerë të politikës, kryesisht të PDK-së.

Grabovci në atë kohë ishte duke u hetuar nga ana e EULEX-it për vepra korruptive në cilësinë e zëvendësministrit të Ministrisë së Transportit dhe Telekomunikacionit, mirëpo këto hetime ndaj tij ishin mbyllur në mungesë të provave.

Në këto përgjime që përfshijnë një periudhë prej dy muajve, nëntor – dhjetor 2011, Grabovci dhe bashkëbiseduesit e tij, mes të cilëve edhe ministri aktual Besim Beqaj, deputeti i PDK-së, Zenun Pajaziti dhe disa persona tjerë, dëgjohen duke diskuar punësimet e personave të afërt me PDK-në në institucione të ndryshme si anëtarë bordesh, drejtorë ndërmarrjesh e agjencish të pavarura.

commentFirst article
Sot mund të lexoni Shfletoni kopertinat