Kryetari i Skenderajt Bekim Jashari sot para anëtarëve të Komitetit për Politikë dhe Financa ka prezantuar propozim-vendimin e tij për miratimin e pakos ekonomike për t’iu dalë në ndihmë bizneseve, fermerëve dhe OJQ-ve duke ndihmuar në rimëkëmbjen e tyre pas situatës së krijuar nga pandemia COVID-19.
Ai me këtë rast ka folur për lehtësirat që do të përfshihen në kuadër të kësaj pakoje, duke filluar nga lirimi nga pagesa e qirasë për periudhën e mbetur të vitit qiramarrësit e lokaleve afariste në pronësi të komunës.
Jashari tha se po ashtu të gjitha bizneset në Komunën e Skenderajt, të cilat paguajnë taksë për shfrytëzimin e hapësirës publike, lirohen nga pagesa për periudhën e mbetur të vitit 2020.
“Sipas mundësive dhe hapësirave që posedon Komuna e Skenderajt do t’i mbështesë OJQ-të lokale në sigurimin e hapësirave të punës në objektet publike, gjithashtu komuna të rrisë buxhetin për subvencione për bujqit dhe për subvencione në fushën e zhvillimit ekonomik, për vitin 2021”, ka shkruar Jashari në Facebook.
Në këtë mbledhje u përkrah po ashtu edhe Korniza afatmesme buxhetore (KAB), të cilën e prezantoi drejtori i Financave, Kastriot Gashi, ku bëri të ditur se nga dita e nesërme do të fillojnë takimet me qytetarët lidhur me këtë kornizë.
Gjatë kësaj mbledhje u përkrah edhe pika e fundit e rendit të ditës, për miratimin e granteve të Drejtorisë së Bujqësisë.
Ndryshe, të gjitha këto pika janë rekomanduar për Seancën e Kuvendit Komunal, e cila do të mbahet me datën 30 qershor.
