Çështjet ekonomike mund të çojnë drejt rrugës së normalizimit të marrëdhënieve mes Kosovës e Serbisë, ka vlerësuar Jetlir Zyberaj, këshilltar politik i Behgjet Pacollit.
Sipas Zyerajt, edhe shefi i tij Pacolli ka parë këtë zgjidhje të problemit, i cili thekson se nuk qëndron në çështjet politike por ekonomike.
”Zoti Behgjet Pacolli në cilësinë e ministrit të jashtëm por edhe të liderit politik partiak e ka parë zgjidhjen me Serbinë krejtësisht në rrafshin ekonomik”.
”Ne politikisht nuk kemi çka t’i japim më Serbisë. Me dokumentin e Ahtisarit ne kemi bërë kompromise politikë. Serbia ka arritur maksimumin në Kosove dhe çdo gjë tutje do të shkonte në dëm të Kosovës. Një zonë e lirë ekonomike, e cila do të formohej mes Serbisë dhe Kosovës do të ishte zgjidhja”.
Ai shton se është në të mirën e vendit që edhe Emisari special për dialogun, Richard Grenell, beson që zgjidhja e problemit mes Prishtinës e Beogradit zyrtar janë opsionet ekonomike.
”Është mirë që i Dërguari Presidencial Amerikan Richard Grenell beson se opsionet ekonomike dhe një zonë ekonomike janë zgjidhjet për problemet me të cilat përballen Kosova dhe Serbia”.
”Normalizimi përmes ekonomisë është rruga jonë e vetme përpara, për të krijuar vende pune, mundësi biznesi dhe prosperitet. Infrastrukturë më e mirë, marrëdhënie më të mira ekonomike dhe tregtia më e lehtë, janë rruga jonë përpara”.
”Kjo është mënyra se si Kosova dhe Serbia duhet të normalizojnë marrëdhëniet dhe të arrijnë njohje reciproke”, shkruan Zyberaj.