Eugen Cakolli hulumtues dhe zyrtar i projektit në Institutin Demokratik të Kosovës (KDI) përmes një postimi në Facebook ka thënë se, shumica parlamentare pamundësoi futjen në rend të ditës të rezolutës për shkarkimin e zëvendëskryeministrit Rakiç, përkundër efektit jo-detyrues të rezolutës.
Sipas tij, Kuvendi ka ende mundësi, më të lehtë dhe me efekt detyrues juridik, për ta iniciuar shkarkimin e Rakiçit, për shkak të deklaratave kundër shtetit të Kosovës.
Postimi i plotë:
Opozita dhe kryetarja e Kuvendit të iniciojnë mocion individual të mosbesimit ndaj Goran Rakicit.
Sot, shumica parlamentare pamundësoi futjen në rend të ditës të rezolutës për shkarkimin e zëvendëskryeministrit Rakiç, përkundër efektit jo-detyrues të rezolutës.
Sidoqoftë, Kuvendi ka ende mundësi, më të lehtë dhe me efekt detyrues juridik, për ta iniciuar shkarkimin e Rakiçit, për shkak të deklaratave kundër shtetit të Kosovës.
Në mënyrë që të evitohet “arroganca e numrave” të shumicës, Kushtetuta ka paraparë mundësinë e ngritjes së mocionit nga vetëm 40 deputetë.
Kështu që, deputetët e opozitës, përfshirë edhe Kryetaren, duhet të fillojnë mbledhjen e 40 nënshkrimeve për mocionin e mosbesimit individual. Kjo do ta obligonte Kuvendin që ta vendosë në rend të ditës votimin e mocionit jo më vonë se pesë, e jo më herët se dy ditë pas parashtrimit të tij.
Në këtë situatë, presioni politik e publik do të vendosej krejtësisht mbi shumicën parlamentare.
Mocioni individual i mosbesimit do t’a vendoste anëtarin e ekzekutivit para përgjegjësisë së drejtpërdrejtë politike ndaj Kuvendit dhe do të ishte hap tejet pozitiv në avancimin e praktikave parlamentare që forcojnë rolin mbikëqyrës të Kuvendit.
