Reagon Donika Gërvalla për sulmin ndaj Vjosa Osmanit, kritikon ashpër Isa Mustafën, e bën këtë paralajmërim për LDK-në - Bota Sot
Reagon Donika Gërvalla për sulmin ndaj Vjosa Osmanit, kritikon ashpër Isa Mustafën, e bën këtë paralajmërim për LDK-në

Aktuale

Reagon Donika Gërvalla për sulmin ndaj Vjosa Osmanit, kritikon ashpër Isa Mustafën, e bën këtë paralajmërim për LDK-në

Nga: A.M. Më: 11 korrik 2020 Në ora: 12:27
Donika Gërvalla

Donika Gërvalla, vajza e heroit Jusuf Gërvalla i ka dal në krah kreuteraes së Kuvendit të Kosovës, Vjosa Osmanit pasi që u kanos nga deputeti i LDK-së, Xhavit Ukaj në Kuvend.

Ajo në postimin e saj në Facebook, e ka quajtur sulm skandaloz ndaj një femre, si dhe ndaj Kuvendit të Kosovës si institucioni më i lartë.

Postimi i plotë:

Sulmi i djeshëm ndaj Kryetares së Kuvendit të Kosovës është skandaloz më së paku për faktin që ishte sulm i një mashkulli primitiv ndaj një femre dinjitoze, një nëne dhe një profesoreshe.

Sulmi i djeshëm paraqet një sulm të palejueshëm ndaj Kuvendit të Republikës së Kosovës, institucionit më të lartë të vendit, të zgjedhur direkt me votat e qytetarëve. Para syve të të gjithëve, me kamera të ndezura. Nuk duhet shumë imagjinatë për të përfytyruar se çfarë bëjnë këta kur mendojnë që nuk i sheh kush.

Që "Lidhja" e Isa Mustafës e ka humbur tërësisht orientimin e sheh edhe në heshtjen që i ka kapluar mbrëmë dhe sot përgjegjësit kryesorë të kësaj partie, duke filluar që nga kryetari dhe nënkryetarët e partisë e duke përfunduar me kryeministrin kukull dhe ministrin e tij të brendshëm. Për femrat në kryesi dhe në Kuvend të mos flasim fare, ato janë aty pikërisht sepse as nuk i pyet njeri dhe as nuk i dëgjon njeri për asgjë.

Nëse Sejdiu dhe Daci e ndanë LDK-në në dy pjesë, Isa Mustafa me njerëzit e tij LDK-në e bënë copë-copë. Struktura bazë, pra nëndegët, janë pajtuar ndërkohë me shkatërrimin total të LDK-së dhe nuk iu ndihet zëri.

Zgjedhjet e ardhshme vërtet do ta fundosin LDK-në, dhe këtë ndërkohë e di gjithkush. Ndryshe nuk shpjegohet shfrenimi dhe nervoza në debatet publike të atyre pak mbështetësve të këtij kursi të "Lidhjes" së Isa Mustafës. Në mungesë të një alternative serioze për votuesin tradicional dhe të mirëfilltë të LDK-së, ky përsëri do të mbetet jetim dhe i papërfaqësuar në Kuvend dhe Qeveri. Mungesa e një partie të mirëfilltë të qendrës, Kosovës edhe për shumë vite do t'ia zgjasë mungesën e stabilitetit politik.

Shfaq komentet
comments powered by Disqus
Sot mund të lexoni Shfletoni kopertinat