Si çdo herë para çdo takimi me palën e Kosovës, presidenti i Serbisë, Aleksandar Vuçiq, përkujdeset për spekulime dhe disa detaje të padëgjuara.
Vuçiq ka njoftuar se në takimin e nesërm në Bruksel në kuadër të vazhdimit të dialogut me Prishtinën, tema e parë do të jetë të zhdukurit dhe të zhvendosurit, e temë e dytë ekonomia, si qarkullimi më i mirë i mallrave, kapitalit, njerëzve dhe shërbimeve, shkruajnë mediumet serbe të mërkurën.
Ai po thotë se ata janë përgatitur, por edhe pala e Kosovës sipas tij janë përgatitur për këtë takim në Bruksel.
“Ne jemi përgatitur, e shoh që edhe shqiptarët janë përgatitur, unë po marrë citate nga shtypi shqiptar. Do të luftojmë”, ka thënë Vuçiq.
Kreu i shtetit serb ka thënë se tashmë tema e intervistimit të Hashim Thaçit është mbi të gjitha diskutimet dhe se çështja e dialogut është vetëm një çështje zyrtare dhe burokratike.
“Marrja një pyetje e Hashim Thaçit në Hagë është mbi gjithçka, dhe kjo është tema e vetme në Prishtinë, dialogu për ta është vetëm një temë zyrtare, burokratike”, ka thënë Vuçiq.
Përveç tjerash presidenti serb ka përmendur edhe miratimin e Rezolutës për vlerat e luftës në Kuvendin e Kosovës, duke thënë se me veprime të tilla do të jetë shumë e vështirë që të ndërtohet mirëbesim mes Serbisë dhe Kosovës, ku sipas tij me rezoluta të tilla do të arrestohet secili serb që flet keq për UÇK’në.
