Edhe pse Hashim Thaçi dikur e akuzonte dhe kërkohej të dënohej presidenti historik, Dr. Ibrahim Rugova, njëri nga bashkëpunëtorët e Thaçit, Sami Lushtaku thotë se lufta në Kosovë kishte nisur me urdhër të Ibrahim Rugovës.
“Shkuarja e Rugovës në Beograd dhe shtrirja e dorës së marrëveshjes së popullit shqiptar dhë i tërë Ballkanit s’është gjë tjetër veç një atak i drejtpërdrejtë në luftën çlirimtare të popullit shqiptar. Është një atak edhe ndaj bashkësisë ndërkombëtare, Shteteve të Bashkuara të Amerikës, NATO’s dhe Grupit të Kontaktit. Veprimet e tilla, anti-kombëtare të Rugovës do të dënohen rëndë”, thoshte Thaci në thirrjen e tij.
E në një intervistë kohë më parë, Lushtaku kishte thënë se lufta e UÇK-se nisi me urdhër të Ibrahim Rugovës.
“Nuk e di nëse urdhrin e ka dhënë Ibrahim Rugova, por ishte koha e LDK-së ku pak a shumë të gjithë shqiptarët e Kosovës ishin në Lidhjen Demokratikë sepse kanë qenë dy rrugë. O me LDK-në o me Serbinë. Edhe unë vet kam qenë në LDK bashkë me familje”, kishte thënë Lushtaku.
Sipas tij, grupet e para në Shqipëri u dërguan për stërvitje me urdhër të qeverisë së Bujar Bukoshit.
E kjo nuk ka qenë hera e parë kur Sami Lushtaku kishte folur për rolin e Ibrahim Rugovës.
Në një debat me ish deputetin e LDK-së, Gani Gecin, Sami Lushtaku kishte treguar për takimin e presidentit Rugova me komandantin legjendar, Adem Jashari.
Edhe pse më herët nuk është përmendur ky rast, Lushtaku thotë se në fillim të ’90-tave Rugova e Jashari janë takuar në Zvicër.
“Kemi shku në Zvicër me Adem Jasharin. Atje e kemi taku qeverinë edhe Ibrahim Rugovën. Unë jo, por Ademi (Jashari) e ka taku Rugovën në vitin 1991”, ka deklaruar kohë më parë Sami Lushataku, i cili ishte një ndër udhëheqësit kryesor të UÇK-së.
Ai kishte treguar se ishte arratisur përmes aeroportit të Shkupit dhe po shoqërohej nga Adem Jashari.
Sipas tij, kur kanë arritur në Zvicër, janë pritur nga qeveria në ekzil e Kosovës dhe vetë presidenti Rugova.
“Nuk e kemi ditë që atje e pret Rugova. Kur kemi shku në aeroport na ka pritur Imer Berisha. Atje na ka pritur edhe Ibrahim Rugova”, kishte treguar Lushtaku, përcjellë “Bota Sot”.