Mediat serbe sot, e mërkurë, raportuan për një takim mes Kosovës dhe Serbisë të enjten e kësaj jave ku BE-ja, thuhej, se do të propozonte një projekt-marrëveshje për palën serbe lidhur me njohjen e Kosovës. Mirëpo, Bashkimi Evropian ka hedhur poshtë gjithë këto spekulime.
“Večernje novosti”, duke iu referuar burimeve diplomatike, raportoi se delegacioni i Beogradit dhe Prishtinës, të cilët do të takojnë përfaqësuesin e BE-së për bisedime, Miroslav Lajçak, do të ju propozohet një projekt marrëveshje gjithëpërfshirëse, e cila nënkupton njohjen de-fakto të Kosovës nga Serbia.
Bashkimi Evropian në një përgjigje ka thënë se nesër, e enjte, do të ketë takim mes ekspertëve mirëpo, ka hedhur poshtë spekulimet e medieve serbe se do të jetë një projekt-marrëveshje në tavolinën e bisedimeve.
Në përgjigjen e BE-së nuk përmendet assesi një “projekt-marrëveshje për njohje de-fakto të Kosovës”, siç kishin aluduar mediat fqinje.
“Si rregull, ne nuk i komentojmë spekulimet e medieve. Por, në këtë rast specifik do të donim të hidhnim poshtë spekulimet rreth raundit të nesër të bisedimeve të ekspertëve dhe agjendës së saj. Dialogu – pas rifillimit të tij në nivelin më të lartë në fillim të këtij muaji – vazhdon me një seri takimesh në nivelin e ekspertëve që janë pjesë e një procesi në vazhdim”, thuhet më përgjigje.
Agjenda e nesërme në Bruksel do të përfshijë çështjen e personave të zhvendosur dhe bashkëpunimin ekonomik.
Për takimin e nesërm nuk ka folur pala kosovare, që udhëhiqet nga koordinatori i Qeverisë për dialog, Skender Hyseni.
Sidoqoftë, për takimin ka folur ministri i Jashtëm serb, Ivica Daçiq, i cili ka thënë se Beogradi nuk e ka informacione që një projekt-marrëveshje gjithëpërfshirëse do t’u dorëzohet delegacioneve të Prishtinës dhe Beogradit, në Bruksel, të enjten.
Ministri i Jashtëm shton se është i bindur që nëse ka një propozim të tillë, Presidenti Aleksandar Vuçiq do të përgjigjet në përputhje me shtetin dhe interesin kombëtar.
Daçiq i tha RTS-së, se është shumë e çuditshme të flasim për një projekt-marrëveshje tani, sepse Vuçiqi nuk do të shkojë në Bruksel të enjten, dhe shton se një dokument i tillë do të shërbente si presion shtesë mbi Presidentin e Serbisë.
“Paraqitja e këtij dokumenti tani në këtë fazë të dialogut do të ishte një surprizë, veçanërisht sepse nuk u njoftua se do të ndodhte, por asgjë nuk është e pamundur. Do të ishte e çuditshme që ata po e bëjnë atë tani, kur Vuçiq nuk është i pranishëm atje, ata njoftuan se dialogu do të vazhdojë në shtator”, tha Daçiq.
Siç thotë ai, nëse ka një dokument të tillë, do të shërbente për të fituar kohë në mënyrë që të bënte presion shtesë në Vuçiq, si jashtë ashtu edhe brenda.
“Nga jashtë, faktorë të ndryshëm po dëshirojnë t’i përdorin për shantazh që Serbia duhet të pranojë një dokument të tillë sepse përndryshe nuk do të kishte mundësi të rrugën evropiane, dhe në skenën e brendshme politike ka nga ata që ndihmojnë presione të tilla duke organizuar demonstrata të ndryshme dhe dhunë në rrugë … janë dy anë të së njëjtës monedhë. Ata duan që gjithçka të kthehet në gjendjen e vjetër”, tha Daçiq.
Shantazhi do të jetë hyrja e Serbisë në BE, thotë Daçiq, sepse thuhet se një marrëveshje ligjërisht e detyrueshme duhet të ndjekë para se të hapet rruga e Serbisë për anëtarësimin në BE.
Ai thekson se është i sigurt se nëse ka një dokument të tillë, Vuçiq do ta informojë publikun për përmbajtjen e tij dhe se përgjigjja e tij do të jetë në përputhje me interesat kombëtare dhe shtetërore.
Ai deklaron se institucionet serbe nuk janë informuar për asnjë dokument në rendin e ditës për të enjten.
