Mimoza Kusari-Lila i reagon sërish kryeministrit Hotit, ja çka thotë për Isa Mustafën

Aktuale

Mimoza Kusari-Lila i reagon sërish kryeministrit Hotit, ja çka thotë për Isa Mustafën

Nga: A.Zh Më: 3 gusht 2020 Në ora: 11:12
Avdullah Hoti dhe Mimoza Kusari-Lila

Deputetja e Grupit Parlamentar të Lëvizjes Vetëvendosje Mimoza Kusari-Lila, i është përgjigjur kryeministrit Avdullah Hoti, pasi ky i fundit tha se sapo ishte testuar të dielën, ishte vetizoluar.

Kusari-Lila, ka thënë se kjo nuk e liron nga përgjegjësia që e mban Hoti, duke thënë se po diskrimohen dhe injorohen të sëmurët dhe viktimat nga Koronavirusi në Kosovë.

Sipas saj, Hoti është sjellur në kundërshtim me të gjitha rekomandimet e IKPSHK-së, pasi vet i 30-ti ka vizituar dje komunën e Dragashit, përcjell Bota sot.

Në postimin e saj, Kusari-Lila ka thumbuar edhe kryetarin e LDK-së Isa Mustafën, duke thënë se është bërë më i zemëruar dhe agresiv, pas shërimit nga Covid-19.

Postimi i saj i plotë:

Së pari edhe një herë për ditën e sotme, ju uroj të shëroheni sa ma parë dhe me sa më pak pasoja. Në veçanti uroj të mos ju mbetet zemërimi dhe gjuha agresive e bashkëpartiakëve tuaj të cilët u shëruan nga virusi.

Së dyti, përgjigja juaj për kohën e testimit dhe pritjen e rezultatit, nuk ju liron nga përgjegjësia që mbani. Përkundrazi, kjo përgjigje vënë në pah diskriminimin dhe injorimin që po u bëhet të sëmurëve dhe viktimave nga virusi në Kosovë.

Ka shumë familje që janë privuar nga e drejta e lamtumirës me më të dashurit e tyre si rrjedhojë e mos posedimit të rezultatit të testit, por vetëm se është dyshuar se ishin të infektuar, ata janë varrosur (ndonjëherë edhe në mbrëmje) të mbështjellë me najllonë në përcjellje të policisë. Pas dy dite është kuptuar se ishin negativ në dyshimin për infektim.

Së treti, ju nuk mund të zgjidhni të silleni në kundërshti me të gjitha rekomandimet e IKPSHK-së për qytetarët të cilëve nuk ju lejohen vizitat, ndërsa ju personalisht, vetë i 30-ti vizitoni biznese e përuroni rrugë sikur mos të ishim vendi me më së shumti viktima në Botë për kokë banori, e pastaj të pritni mirëkuptim dhe amnisti nga përgjegjësia kur kuptoni se jeni të infektuar.

Z. Hoti, nëse pretendoni të jeni Kryeministër i përgjegjshëm, atëherë, duhet të pranoni gabimet tuaja dhe pasojat që vijnë me to.

Ju u sollët për t’u kritikuar z. Hoti, ju nuk respektuat rregullat dhe vazhdoni të mos mbani përgjegjësi për pasojat që i vuajnë edhe tjerët rreth jush.

Andaj, para se të krijoni më shumë dëm se sa që keni krijuar deri më tani dhe para se të mos vijmë në ditën kur zyrtarisht jemi në katastrofë, thirrni ndërgjegjës dhe merrni përgjegjësi të cilat vijnë me postin të cilin pa legjitimitet e mbani.

Shfaq komentet
comments powered by Disqus
Sot mund të lexoni Shfletoni kopertinat