Hoti: Vendimi për shtyrjen e vitit shkollor, jo i lehtë, na duhet përgjegjësi dhe angazhim i përbashkët për ta fituar këtë betejë

Aktuale

Hoti: Vendimi për shtyrjen e vitit shkollor, jo i lehtë, na duhet përgjegjësi dhe angazhim i përbashkët për ta fituar këtë betejë

Më: 29 gusht 2020 Në ora: 11:14
Avdullah Hoti

Kryeministri i vendit, Avdullah Hoti, ka theksuar se vendimi për shtyrjen e shkollave deri me datën 14 shtator nuk ka qenë i lehtë.

Hoti thotë se këtë betejë të cilën e kemi përpara nuk mund ta fitojnë vetëm mjekët por të gjithë së bashku me disiplinë dhe përgjegjshmëri.

Ai u ka bërë thirrje prindërve të shfrytëzohet kjo kohë deri në fillimin e vitit të ri shkollor për tu folur fëmijëve si  të mbahet distanca, maska dhe higjiena.

Ai tutje ka shtuar se të gjithë përgjegjësit e shkollave duhet ta përdorin këtë periudhë dy javore për të bërë përgatitjet e duhura.

“Në anën tjetër çdo mësimdhënës, punëtor shkolle e përgjegjës institucional duhet ta përdorë këtë periudhë dy javore për të bërë të gjitha përgatitjet në shkollë që shëndeti i fëmijëve të mbrohet” shkruan Hoti në Facebook.

Postimi i plotë i Hotit:

Të nderuar nxënës dhe prindër,

Lajmi për mos fillimin e mësimit deri më 14 shtator nuk ju ka gëzuar, përkundrazi. Nuk ka qenë e lehtë të marrim një vendim të tillë. Por, shëndeti i juaj dhe i prindërve e gjyshërve tuaj na detyron të jemi të kujdesshëm.

Na duhet disiplinë e përgjegjësi individuale e kolektive për të tejkaluar së bashku këtë situatë. Kjo sfidë, që tashmë është shndërruar në betejë, nuk mund të fitohet vetëm nga mjekët dhe nga institucionet. Duhet të rreshtohemi bashkë, njëri krah tjetrit, për t`i bërë ballë virusit tash kur po ofrohet vjeshta.

14 shtatori është afër. Shumë kush do të thotë se për këto dy javë nuk do të fitojmë asgjë, por gabohen. Kur të gjithë së bashku pranojmë të vihemi në shërbim të shëndetit të fëmijëve tanë, mund t`i bëjmë lak së keqes duke e evituar atë.

Në këto ditë që kemi përpara, si prindër duhet të flasim shumë me fëmijët tanë për rëndësinë që ka të mbajturit e maskës dhe distancës edhe atëherë kur vrulli fëmijëror kërkon që rregulli të thyhet. Duhet t`u bëjmë me dije fëmijëve tanë se ata duhet të kujdesen për shëndetin e tyre dhe tonin. Duhet ta kuptojnë këtë si mision.

Në anën tjetër çdo mësimdhënës, punëtor shkolle e përgjegjës institucional duhet ta përdorë këtë periudhë dy javore për të bërë të gjitha përgatitjet në shkollë që shëndeti i fëmijëve të mbrohet.

Unë jam optimist se ne kemi zgjuarsinë dhe dashurinë për fëmijët për të përballuar me sukses kthimin e tyre në shkollë dhe në shoqërim me njëri-tjetrin.

commentFirst article
Sot mund të lexoni Shfletoni kopertinat