Ministrja e Punëve të Jashtme dhe Diasporës, Meliza Haradinaj Stublla ka pritur sot në takim ambasadorin e Gjermanisë në Kosovë, Joern Rohde.
Me këtë rast ministrja Haradinaj Stublla e ka falënderuar ambasadorin Rohde për ndihmën që ky shtet do t’i jep Kosovës, duke dërguar një delegacion të përbashkët të OBSH-së dhe Gjermanisë për të ofruar ekspertizën e tyre në lidhje me menaxhimin e pandemisë Covid-19.
“Prita sot në takim Ambasadorin e Gjermanisë në Kosovë, Joern Rohde. E falënderova z.Rohde dhe shtetin gjerman që pas shkëmbimit të letrave mes Ministrive tona, një delegacion i përbashkët Gjermani/OBSh i ekspertëve mjekësor nga Instituti Robert Koch, GOARN dhe EMT, do të qëndrojnë në Kosovë për të ofruar ekspertizën e tyre në lidhje me menaxhimin e pandemisë Covid-19”, tha ministrja Haradinaj Stublla.
Kryediplomatja ka falënderuar gjithashtu shtetin gjerman edhe për rolin konstruktiv të tij, në procesin e liberalizimit të vizave për Kosovën, si dhe për rolin konstruktiv në udhëheqjen e orientimit strategjik të BE-së.
