Edhe juristi Dastid Pallaska, ka komentuar për arrestimet e krerëve të OVL-UÇK-së Hysni Gucatit dhe Nasim Haradinajt nga Gjykata Speciale.
Ai ka thënë se personat përgjegjës për rrjedhjen e dosjeve që mund të rrezikojnë sigurinë e dëshmitarëve dhe integritetin e procedurave penale që pritet të zhvillohen para Dhomave të Specializuara, duhet të ndiqen penalisht.
Por, sipas tij, ndjekja penale duhet të fillojë nga vetë Zyra e Prokurorit të Specializuar, nga ku siç ka thënë ai, pretendohet se kanë rrjedhur dosjet e klasifikuara, përcjell Bota sot.
Reagimi i tij i plotë në Facebook:
Sot gjatë drekës djali im i vogël më pyeti për rrëmujën e arrestimeve të djeshme, të cilat rastësisht i kishte parë në televizion mbrëmë.
Zakonisht nuk i bëjnë përshtypje lajmet por skenat e djeshme duket se i kishin dhënë një ndjenjë pasigurie.
Pyetja e tij e parë ishte se çfarë kishin bërë të arrestuarit.
I thash se të arrestuarit dyshoheshin se kishin penguar drejtësinë duke publikuar dokumente sekrete të Zyrës së Prokurorit të Specializuar në Hagë.
Pas kësaj, ai shkurt më pyeti se a kanë qenë të arrestuarit punëtorë të prokurorisë!
Kjo pyetje e pafajshme e një njëmbëdhjetë vjeçari - e cila në fakt paraqet edhe një konstatim logjik - shpalosë thelbin e problemit të qasjes së Zyrës së Prokurorit të Specializuar ndaj skandalit të rrjedhjes së dosjeve të klasifikuara nga ky institucion i drejtësisë.
Të gjithë e kuptojmë apo duhet fa kuptojmë se personat përgjegjës për rrjedhjen e dosjeve të klasifikuara - që mund të rrezikojnë sigurinë e dëshmitarëve dhe integritetin e procedurave penale që pritet të zhvillohen para Dhomave të Specializuara - duhet të ndiqen penalisht.
Por ndjekja penale është e pakuptimtë dhe po aq jo efektive nëse nuk fillon nga vetë Zyra e Prokurorit të Specializuar, nga ku pretendohet se kanë rrjedhur dosjet e klasifikuara.
