Ish-zëvendësministri i Mbrojtjes Enver Dugolli, ka reaguar pas skandalit me vjedhjen e 2 milionë eurove në Thesarin e shtetit.
Ai ka thënë se vendimi për larimin e këshilltares Hajrie Gashi, nga zëvendëskryeministrja e Kosovës, Albulena Balaj-Halimaj, pse babai i saj është i përfshirë në vjedhje, është paradoksal.
Sipas Dugollit, ky diskurs është i së kaluarës dhe shoqëria e Kosovës duhet të lirohet nga ai një ditë.
“Kjo formë e të vepruarit, tregon për krizën e madhe të partive (në këtë rast NISMA) të cilat mundohen të shpërlajnë veten më këso veprimesh, tejet irracionale!”, ka shkruar ai në Facebook.
Reagimi i tij i plotë:
Skandal pas skandali!
Kur skandalet e ndryshme të kësaj qeverie dhe krizat janë kthyer në përditshmëri, kalon edhe diçka për të cilën shoqëria do duhej të reagon.
Fjalë bëhet për këtë lajm-veprim që si duket po kalon pa ndonjë bujë, e ku thuhet:
"Pas raportimeve në media, se babai i këshilltares Hajrie Gashi, është i përfshirë në vjedhjen e mbi dy milionë eurove, zëvendëskryeministrja e Kosovës, Albulena Balaj-Halimaj, ka marrë vendim ta lirojë nga detyra".
Ky lajm dhe vendim i znj.Balaj-Halimi tregon se jetojmë në një shtet dhe shoqëri paradoksale. Znj. Hajrie Gashi duhet paguaj një çmim sepse një anëtar i familjes (në këtë rast babai i saj) dyshohet se qenka i përfshirë në një krim të rëndë.
Përveçse nuk pajtohem me këtë veprim të znj. Balaj-Halimi, kjo ma kujton kohën e diferencimeve ideo politike të kohës së Jugosllavisë, ku pësonin gjithë anëtarët e familjes pse dikush paskësh kryer ndonjë vepër kundër shtetit.
Ky është diskursi i së kaluarës nga i cili do duhej të lirohemi një ditë.
Mirëpo, pas kësaj që po shohim, tani shtrohet pyetja; nëse znj. Hajrie Gashi ka pësuar nga veprimet e dyshuara të babait të saj, cili është dënimi që partia NISMA do duhej të paguante nga se ashtu siç u raportua, babai i znj.Gashi paska qenë anëtar dhe strukturë e kësaj partie?!
Rezultati po dihet. Partia nuk paguan asgjë. E pëson vajza sepse faji i vetëm i saj (ashtu siç u raportua) qenka se është bija e të dyshuarit!
Kjo formë e të vepruarit, tregon për krizën e madhe të partive (në këtë rast NISMA) të cilat mundohen të shpërlajnë veten më këso veprimesh, tejet irracionale!
