Raporti i Gjykatës Speciale sqaron se ish-presidentit, Hashim Thaçi, i ishte kumtuar me 4 nëntor, ora 15:00, konfirmimi i aktakuzës.
Thaçin e kishin takuar zyrtarë të Speciales duke e njoftuar për aktakuzën dhe urdhrin e arrestimit të tij.
“Pak pas orës 15:00, më 4 nëntor 2020, oficerët e sigurisë operative të SPO-së u takuan me z. Thaçi. Thaçi ishte i informuar se aktakuza kundër tij ishte konfirmuar dhe lëshuar një urdhër për arrestimin e tij, por që po i jepej mundësia të paraqitej në orën 10:00 të mëngjesit vijues”, thuhej në raportin e arrestimit të Hashim Thaçit.
Ndër të tjera, ai u këshillua që nëse do të përpiqej të largohej nga vendi, ose të ndërmerrte ndonjë hap për të penguar drejtësinë ose ndërhyrë në dëshmitarët, ai do të arrestohej menjëherë.
Ish-presidenti iu kishte treguar zyrtarëve të sigurisë së SPO-së për aktivitetin e tij të mbetur të datës 4 nëntor, derisa i kishte kërkuar atyre që të nesërmen të ketë mundësi të i drejtohet qytetarëve të Kosovës.
Në raport tregohet edhe për rrugëtimin e Thaçit për në Hagë. Ai ishte pajisur me mjete mbrojtëse anti-COVID, si dhe që iu kishte dhënë një pije freskuese në aeroplan.
Vlen të theksohet se Thaçi kishte dhënë dorëheqje nga posti i presidentit më 5 nëntor.