Zagrebi mund ta forcojë rolin e tij në dialogun Prishtinë-Beograd. Kështu ka thënë ministrja e Jashtme e Kosovës, Meliza Haradinaj-Stublla gjatë vizitës së saj në Kroaci.
“Zgjidhja e vetme e pranueshme është njohja reciproke, me respektimin e integritetit territorial, shtetit unitar dhe kushtetutshmërisë së shtetit”, tha Haradinaj-Stublla.
Homologu i saj kroat, ministri i Jashtëm Gordan Grlić Radman tha se “Kroacia mbështet plotësisht dialogun Kosovë-Serbi që zhvillohet me ndërmjetësimin e BE-së dhe e konsideron këtë proces dhe rezultatin e tij si kontribut në stabilitetin e rajonit më të gjerë të Evropës Juglindore”.
Nga ana e tij, kryeministri kroat, Andrej Plenković – i cili u takua me zëvendëskryeministrin e Kosovës, Besnik Tahirin – tha se ka vend për zhvillim të mëtejshëm të marrëdhënieve ekonomike me Kosovën për çështje të ndryshme dhe se Kroacia do të ndihmojë në mënyrë aktive Kosovën në rrugëtimin e saj evropian.
