Në mesin e konsujve të shkarkuar nga Vjosa Osmani është edhe djali i Isni Kilajt, eksponentit të moçëm të PDK-së

Aktuale

Në mesin e konsujve të shkarkuar nga Vjosa Osmani është edhe djali i Isni Kilajt, eksponentit të moçëm të PDK-së

Më: 25 nëntor 2020 Në ora: 19:52
Isni dhe Blendi Kilaj

U.d. Presidentja, Vjosa Osmani-Sadriu ka shfuqizuar katër dekrete për konsujt në Pragë, Lubjanë, Shkup e Tiranë.

Mësohet se konsujt që iu janë shfuqizuar dekretet janë: Flakron Shala, (Pragë), Blendi Kilaj (Lubjanë), Lindon Kqira (Shkup), dhe Halim Krasniqi (Tiranë).

Flakron Shala është djali i deputetit të AAK-së, Haxhi Shala.

Media po ashtu mëson se Blendi Kilaj është djali Isni Kilajt ish kryetar i Malishevës nga PDK-ja dhe ish zëvendësministër i Diasporës.

Ish zëvendësministri Kilaj është një eksponent i moçëm i PDK-së në Malishevë, në zgjedhjet e parakohshme që janë mbajtur në tetor, ka mundur të marrë 5270 vota, e që nuk ishin të mjaftueshme për t’u bërë deputet. Poste zëvendësministri ka pasur edhe në dikastere të tjera qeveritare. Ka qenë edhe kryetar i Komunës së Malishevës dhe aktualisht është edhe kryetar i Degës së PDK-së në këtë komunë.

Sipas Vjosa Osmanit, sa i përket tri rasteve të para, bazuar në praktikën diplomatike e konsullore, konsullatat e përgjithshme, si rregull, nuk hapen dhe konsujt e përgjithshëm nuk emërohen në të njëjtin qytet ku ndodhet edhe Ambasada. Për më tepër, bazuar në informatat që na janë dërguar, për këta konsuj të përgjithshëm nuk kishte ekzekuaturë/pëlqim nga shteti pritës”, thuhet në njoftim.

Ndërkaq, sa i përket rastit të katërt, atij të konsullit në Tiranë, Halim Krasniqit, u.d e Presidentes ka vendosur ta shfuqizojë dekretin për emërimin e konsullit të përgjithshëm, në përputhje me propozimin e Ministrisë së Punëve të Jashtme, propozim ky i cili sipas saj nuk ishte marrë për bazë nga Presidenti paraprak.

Ndryshe, këtë vendim Osmani e kishte paralajmëruar më herët gjatë ditës së mërkurë pasi mediat raportuan për emërimin e Flakron Shalës, djalit të deputetit Haxhi Shala, si Konsull i Përgjithshëm në Pragë.

Vota e Haxhi Shalës ka qenë vendimtare në votimin e Qeverisë aktuale të drejtuar nga Avdullah Hoti.

Gjatë seancës së Kuvendit të Kosovës, kur është votuar për qeverinë e re, deputeti Shala pati deklaruar se ai ka ndryshuar mendimin për ta votuar qeverinë, pasi një natë më parë kishte takuar ish-presidentin e Kosovës, Hashim Thaçin dhe kryetarin e Aleancës për Ardhmërinë e Kosovës, Ramush Haradinaj.

Emërimi i Flakron Shalës në këtë pozitë ishte kundërshtuar edhe nga shoqëria civile në Kosovë.

Kryeministri i Kosovës, Avdullah Hoti ka thënë të mërkurën se ky emërim ishte bërë pa pasur një koordinim me të.

Ai tha se është informuar nga mediat për këtë rast.

Ndërsa vetë Flakron Shala përmes një postimi në rrjetet sociale ka thënë se në pozitën Konsullit të Përgjithshëm është “emëruar sipas ligjit në fuqi”.

“Prindi im, Haxhi Shala, si një deputet i Kuvendit të Republikës së Kosovës nuk ka as më shumë e as më pak autoritet ligjor e politik se deputetët tjerë- pra deputeti nuk ka kompetencë të emëroj apo shkarkoj zyrtarët e MPJ-së dhe as Konsujt e Përgjithshëm”, ka shkruar Shala.

Ushtruesja e detyrës së presidentit, tha përmes komunikatës se “si udhëheqëse e politikës së jashtme, është e përkushtuar që të mbrojë ligjshmërinë dhe profesionalizmin përgjatë emërimeve në shërbimin e jashtëm”.

Osmani është zotuar se do të vazhdojë të insistojë, që të mos tejkalohet kuota e emërimeve politike, e paraparë me Ligjin për Ministrinë e Punëve të Jashtme dhe Shërbimin Diplomatik, dhe që emërimet të bëhen nga radhët e diplomatëve të karrierës.

commentFirst article
Sot mund të lexoni Shfletoni kopertinat