(E plotësuar 17:05) - Kryeministri i Republikës së Kosovës, Albin Kurti, në konferencën për media pas mbledhjes së Qeverisë ku ka miratuar programin Qeverisë, ka folur për çështjen e përgatitjes së padisë për gjenocid ndaj Serbisë, atë të dialogut me Serbinë dhe për punën e ofrimit të garancisë për krerët e UÇK-së që po mbahen në Hagë.
Kurti ka paralajmëruar se do të bëhen përgatitje të mëdha për ta paditur Serbinë për gjenocid, dhe sipas kreut të ekzekutivit një rast i tillë nuk duhet të humbet.
“Kemi filluar punën për ngritjen e padisë për Serbinë. Do t’iu njoftojmë për këto përgatitje. Janë përgatitje gjigante, dhe një rast i tillë nuk guxon të humbet. Ne jemi të bindur që Serbia ka kryer gjenocid në Kosovë, dhe kjo e Meriton një padi. Dhe Qeveria e ka obligim ndaj historisë dhe ndaj ardhmërisë sonë”, ka thënë Kurti.
Sa i përket dialogut, Kurti ka thënë se data e takimit të qershorit dhe temat ende s’janë caktuar, ndërkohë ka njoftuar se më 18 maj do të udhëtojë drejt Brukselit për një darkë pune me Josep Borellin.
“Do të ketë një darkë pune me Përfaqësuesin e lartë të BE’së me Borellin më 18 maj. Takimi I 11 majit s’mbahet, sepse takimet mbahen kur pajtohen të gjithë. E kemi lënë që takimi I tillë të mbahet në muajin qershor. Por besoj se ditë përpara asaj date, do të njoftoheni të gjithë. Sa i përket temave të diskutimit, do të jenë të tilla për të cilat pajtohen palët. Do të bisedojmë edhe me partitë politike opozitare edhe në Kuvend ku jemi bashkë. Do të skanojmë edhe marrëveshjet e deritashme. Nuk jemi qeveri që zhvillon dialog me Serbinë, pa zhvilluar dialog në Kuvend”, ka sqaruar kryeministri Kurti.
I pyetur nga gazetarët për punën e shumë diskutuar të ofrimit të garancisë për mbrojtje në liri të krerëve të UÇK’së që po gjykohen në Hagë. Kurti ka thënë se Kosova s’mund të jetë si shtet i tretë meqë Specialja “është një këmbë në Kosovë e një këmbë jashtë Kosovës”.
Derisa ka thënë se si kryeministër s’mund as t'i kërkojë Kroacisë ofrimin e garancisë për Gjykatën Speciale për mbrojtjen në liri të krerëve të Ushtrisë Çlirimtare të Kosovës.
“Problemi me çështjen e garancisë është që Kosova nuk është shtet i tretë. Në Gushtin e 2015, argumenti kryesor pse duhej të votohet amendamenti 24 e që ne e kundërshtuam, ka qenë që nëse nuk e bëjmë ne, do të bëhet gjykatë ndërkombëtare. Ne e kemi ditur që nuk ishte ashtu. Ne e kishim të qartë që kjo Gjykatë nuk do të ishte krejtësisht jashtë Kosovës, por një këmbë jashtë e një këmbë brenda. Prandaj jemi në këtë situatë te pafavorshme, kur Kosovës me vendimin e gushtit i pamundësohet. Nuk mund të kërkoj unë garanci nga Kroacia. Ka një proces juridik ndaj atyre që janë në burg. Nuk është shteti në gjyq. S’më takon mua që të marr këso hapash. Do të ishte gabim për shtetin”, ka theksuar ndër të tjera kryeministri.
Kurti: Vaksinimi, vettingu dhe punësimi prioritet e planit qeverisës
Kryeministri Albin Kurti pas miratimit të planit qeverisës, tha se menaxhimi i pandemisë dhe sigurimi i vaksinave janë dy prioritete urgjente.
“Gjatë muajit prill kemi identifikuar gjendjen në fusha të ndryshme. Kjo na ka ndihmuar që ta përpilojmë këtë program qeveritar. Dy prioritete urgjente ka ky plan, te dyja kanë të bëjnë me pandeminë. Vaksinimi dhe menaxhimi. Sigurimi i vaksinave është prioritet”, u shpreh Kurti.
“Synimi ynë është që të marrim vaksina dhe në mënyrë që në stinën e verës të vijë mërgata jonë që t’i jep rimëkëmbje ekonomisë. Është e domosdoshme që të kemi kulturë të re të qeverisjes, transparencë radikale.
Ne kemi fituar me dy fjalë kryesore dhe ato janë drejtësia dhe punësimi. Nuk do të lejojmë që të jetojë asnjë qytetar me varfëri ekstreme. Mërgatën do ta bëjmë pjesë të zhvillimit ekonomik”, tha Kurti.
