Grevë e minatorëve të Trepçës – kundërshtohet ndërrimi i krye-shefit dhe emërimi i krye-shefit të ri

Aktuale

Grevë e minatorëve të Trepçës – kundërshtohet ndërrimi i krye-shefit dhe emërimi i krye-shefit të ri

Nga: F. B Më: 15 tetor 2021 Në ora: 20:23
Trepça

Minatorët e minierës me flotacion Trepça janë në grevë dhe kanë kërkuar nga Bordi i kësaj ndërmarrje takim-sqarimi lidhur me vendimin e sotshëm që Enis Abdurrahmani të emërohet krye-shef i Trepçës, në kohën kur ndërmarrja ishte në bilanc pozitiv, kishte rritje disipline në punë dhe mbi të gjitha rritje të vazhdueshme të prodhimit.

Kundër emërimit janë shprehur sindikata e minatorëve të Trepçës, të cilët po ashtu kanë kërkuar nga bordi njoftim dhe takim zyrtar, lidhur me vendimin e sotshëm, i cili vjen në momentin kur ndërmarrja ka shënuar rritje prodhimi dhe mbarëvajtje në sigurimin e pagave edhe shlyerjen e borxheve.

Të përkujtojmë se që nga dhjetori i vitit që shkoi kur në krye të Trepçës si zëvendës fillimisht e pas disa muajve edhe si krye-shef i ndërmarrjes Trepça erdhi Rafet Ibishi,  vazhdimisht Trepça ka shënuar rezultate pozitive , rritje prodhimi, rritje përgjegjësisë në punë dhe shlyerje të borxheve, ndërkohë që nuk ka marr asnjë donacion mbështetje nga qeveria, siç bënte në të kaluarën.

Si rezultat i këtyre masave dhe duke falënderuar minatorët, vetëm në muajin shtator janë shënuar rezultate rekorde prej 18  mijë tonë prodhim, ndërkohë që përkushtimi dhe angazhimi i minatorëve është për çdo lëvdatë, ka thënë krye-shefi i deritashëm Rafet Ibishi.

Sipas burimeve nga ndërmarrja Trepça, gjatë kësaj kohe ndërmarrja ka siguruar me kohë pagesat me furnitorët edhe pagat e punëtorëve pa asnjë vonesë, sikurse fal këtij bilanci ia doli të shlyejë edhe mbi 2 milionë euro borxhe të trashëguara.

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat